Hikûmeta AKP bi polîtîkayanê şaş welat kirêşna krîzeke xorî yê ekonomîye û sîyasîye mîyan. La rixmê nayî zî AKP hewl dano ke welatijan reyna bixapîno û referandûmê 16ê Nîsane de reyî bigîro. Welatijê Wanî yê bêker vistî vîr ke herinda çereserî de şer yeno kerdiş û vatî, 'seba çareserî ganî şar bi hawayo xurt vajo Nê.'
Welatijan ra Mehmet Aşkano ke 1994 ra nata her rojî yeno û şono Qehwexaneyê Bêkaran qiseykerdişê xo de wina va: “Wexto ke prosesê haştî xira bî, kar zî xira bî. Esnafî çinbîyayîşî ver de ya. Seba ke welat de qirkerdiş û qetlîam nêvirazyî, ganî her kes referandûm de vajo nê.”
Bi torpîl yenê
Serhat Yalçino ke her roje seba karî yeno qehwexaneyî wina va: “Hûmara kesê bêkaran, zaf a. Ez her roje kar gêrena labelê kar çin o. Merdimî vêşanî ver de yî. AKP heta nika çîyêk safî nêkerdo. Êdî ma înan ra bawer nêkenî.”
Suleyman Cidanî ke qehwexane de paweyê karî yo, qiseykerdişê xo de wina va: “Ma nêeşkenê bi hawayo azad fikrê xo bîyarî ziwan. Wan de kesê ke AKP de torpîlê înan esto, girîyenê gure. AKP şarî ra ruşwet gêno. Sîstemê xapênayîşî dewre de yo. Ez do vaja nê.”
Çareserî nê, şer
Orhan Bayramo ke hesabdar o qiseykerdişê xo de wina va: “Karê dewlete tena şer o. Ti problemî nînê çareserkerdiş. Eke welat baş îdare bibîyêne do reşwa ma zî baş bibîyenê. Herinda çereserî de şer yeno kerdiş. Seba çareserî ganî şar bi hawayo xurt vajo nê.”
Alî Ozdemîro ke bi erebeyê 3 tekelin bar kirişeno zî wina va: “Çareserîya bêkarî û heme probleman aştî ya. Êdî ma nêeşkenî seba kar şêrî teberê bajarê xo. Referandûm bi zuran û seba menfîetê kesêk ameyo amadekerdiş. Bedilnayîşê qanûno bingeyî de seba şarî çîyêk çin o.”
ANF/WAN