Seba çareserî proje lazim o

23ê çileyî de paytextê Kazakîstanî Astana de bi organîzatorîya Rûsya, Îran û Tirkîya de kombîyayîşêk ame viraştiş. Her çiqas ke kombîyayîş hesaban ra seba çareserkerdişê krîzê Sûrîye ame viraştiş, seba ke muxatabê bingeyî yê Sûrîye nêameyî dawetkerdiş, kombîyayîş bê netîce peynî bî. Babete ser o Endamê Komîteya Rêxistinbîyayîşî yê Federalîzmê Demokratîke yê Sûrîyeya Vakurî Ferhat Dêrik qisey kerd.Dêrikî va ‘kombîyayîşo ke bêro viraştiş, ganî çareserî hedef bigiro. Kombîyayîşê ke seba sewbîna hedefan bêrî viraştiş, do netîce nêgirî’ û qiseykerdişê xo wina domna: “Ganî heme hêzê ke teberê terorî de yî, beşdar bibî, la Astana de wina nêbî. Pêvînayîşê Astana de Rûsya hewl daye ke hîna zaf Tirkîya bigiro bin kontrolê xo. Grûbê ke beşdarê kombîyayîşî bîyî, bi polîtîkayê Tirkîya ke Sûrîye de îflas kerdbî, beşdar bîyî. Heto bîn ra waştênê ke HSDyî bigirî lîsteya terorî.”

Ganî proje bibo 

Dêrikî dewamê qiseykerdişê xo de va ‘Pêvînayîşê Astana ra dima Rûsyaye PYD, MSD û temsîlkaranê bînan dawetê Moskova kerde’ û wina dewam kerd: “Êdî înan zî fam kerdo ke bê temsîlkarê Sûrîyeya Vakurî çareserî nêbeno. Tena Rûsya nê, Amerîka zî wina fikiryena. Astana de çîyêko bîn vejîya orte; 3 dişmenê yewbînan yê tarîxî Rûsya, Îran û Tirkîya ameyî têhet. No têhetameyîş beno ke çîyê dem demî bîyaro, la çîyêko mende nêano. Seba ke Sûrîye de çareserîyêka rastikêne bivejîyo, ganî heme hêzê sîyasî û leşkerî ke welat de yî bêrî têhet. Ma DAIŞ, El Nusra û Ehrar-El Şamî teberê neyî de vînenî. Reyna seba çareserî ganî projeyêk bibo. No proje zî polîtîkayanê hêzê teberî nê, ganî qezencanê şarî esas bigiro.”