Hukmatê AKPyî 2 serrê peyênan de polîtîkayanê talankerdişî sey dewamê polîtîkayanê şerî Kurdistan de domneno. Bitaybetî qezaya Sûrî ya Amedî de şerê 103 rojan ra dima projeyanê talankerdişî Bexçeyanê Hevselî de erzîyenî dewre. Bi îlankerdişê Qerarnameyanê Hukmê Qanûnî (KHK) Hevsel sey ‘warê rekreasyono taybet’ ame îlankerdiş û nika zî dest bi rijnayîşê Hevselî kerdî.Babete ser o Endama MYKyî ya HDPyî û Endama Komîsyonê Ekolojîyî ya HDPyî Prof. Dr. Beyza Ustune qisey kerde û têkilîya ci û referandûmî va.
Seba sermayegozarî
Ustune va ‘hukmat 2012 ra nata pawitêne ke nê planî bierzo dewre’ û qiseykerdişê xo wina domnaye: “2012 de no plan amebî aşkerekerdiş û badê ke TMMOBî îtîraz kerdbî, plan demêk ame vindetiş. Dima ra 2014 de reyna ame rojeve û na rey zî wendekaran vera ci de têkoşîn dayî û planî betal kerdî. Sey ke yeno zanayîş 2015 ra dima Sûr de hêrişê dewlete dest pêkerdî û tîya de seba sermayegozarî planî ameyî viraştiş. Cok ra cayê tarîxî ameyî rijnayîş. ”
Tarîx talan beno
Ustune dewamê qiseykerdişê xo de wina va: “Bexçeyê Hevselî hetê keye û daran de warê cuye de zî yeno çinkerdiş. Nika ra pey seba Hevselî çi bêro kerdiş zî feydeyê ci çin o. Cayo ke yeno rijnayîş, kultirê 8 hezar serran o. Ewja de şarî cayê xo ra yenî dûrîkerdiş. Verê ra Hevsel hedefê şîrketanê sermayeyan de bî û nika saya AKPyî de şîrketî şênî bikewî ê cayan. Ma nika halê Sûrî vînenî. Ewja de cayê ke tarîxê înan 500 serreyî yo, bi wesayîtanê şerî ameyî rijnayîş û nika herinda înan de bi destê TOKÎ û sewbîna şîrketan de awanîyî yenî viraştiş.”
Seba gandaran 'Nê'
Ustune peynîya qiseykerdişê xo de va ‘Vera rijnayîş û talanî de cewabo tewr baş do 16ê Nîsane de bêro dayîş’ û wina qedênaye: “Ma partîyêka cinîyan î û cok ra ma wazenî ke wa cuye mîyanê aştî û ekolojîyî de derbaz biba. Cok ra ma do vajî nê. Qet sebebê ma yê vatişê nê çinêbo daxî, ma do seba ke reyna Sûr, Cizîr û Nisêbîn nêro cuyayîş, wa reyna Cûdî nêveşo û Hevsel çin nêbo; ma referandûm de vanî nê.”
ŞÛJIN/AMED