Cemxaneyê Duzgun Babayî yê Qisle yê Dêrsimî çarçewaya Aşma Mûharremî de Rasteyê Seyîd Rizayî de loqme vila kerd. Vilakerdişê loqmeyî bi vatişê ‘Ma bi eşqê Heqî sere nêrona, ma seba Xizirî rêz girewt’ ame dayene û pîrê Ocaxî, temsîlkarê partîyê sîyasî û dezgehanê sîvîlî beşdar bîyî.
Qiseykerdişê akerdişî yê loqmeyî hetê Serekê Komeleya Cemxaneyî Sînan Kirmiziçîçekî kerd û wina va: “Senî ke Hz. Huseyîn vera zulm, zext û îxanetî de sere nêrona û xover da, heta roja ma ya ewro Yezîd û ê ke zîhnîyetê ci de yî bindestan ser o Kerbelayê neweyî dayî cuyayene. Ma loqmeyê xo seba canê ke 37 û 38 de Dêrsim, Gurgum, Sêwas, Çorûm, Roboskê, 12ê Êlule û 10ê Teşîna verên de şehîd bîyî danî.”
Kirmiziçîçekî dewamê qiseykerdişê xo de wina va: “Ma do wayîrê nasname, bawerî û kulturê xo bivejyî. Ma do nê ewranê sîyayan xo ser ro bierzê û vera kehenperestîye de yewîye û pîyatîya xo awan bikerî û têkoşînê xo yê heq û edaletî berz bikerî.”
Qiseykerdişan ra dima pîrê Ocaxê Kureyşanî Cemal Canî gulbeng da û loqmeyî ameyî vilakerdene.
DÊRSIM