Cem û Hasret Aslantaşê ke Almanya de cuyenî, seba keyeyanê Ayaz û Nûpelda ke netîceyê teqayîşê mayînî de merdbî û Engîn Eroglûyo ke Çemê Muzirî de xeniqîyabi kampanya da destpêkerdene.
Cem Aslantaşî dîyar kerd ke înan vato ‘ma xora şonî Erzîngan, qe nêbo wextê şîyayîşî de ma tayê çîyan pêsernî û bidî keyeyî’ û wina domna: “Mi derheqê Engînî de vîdeo, nuşte, resim û sewbîna amade kerdî û pare kerdî. Ez mecbûr menda ke 23 saetan ra dima pada, çimkî kampanya zaf hîra bî.”
Aslantaşî dewamê qiseykerdişê xo de wina va: “Hîna aye kampanya newe qedîyabîye, na reye Nûpelda û Ayaz ameyî qetilkerdene. Ma wexto ke seba Engînî kampanya viraşte, ma hunermend Ferhat Tunçî de zî kewtî têkilî. Ey zî destek da ma. Ma ci rê sipas kenî. Kampanyaya ke ma seba Nûpelda û Ayaz da destpêkerdene zî xeylê pîl bî. Ma mecbûr mendî ke 12 saetî ra dima bivindarnî.”
Pare bikerê ke wa edalet bêro
Cinî û camêrdî derheqê pêvînayîşê keyeyan de va ‘wexto ke ma şertê keyeyan dî, ma fam kerd ke ti derdê ma çin o’ û wina dewam kerdî: “Her di keyeyan ma ra waşt ke ma resim û vîdeoyanê domanan pare bikerî ke wa edalet bêro. Tena şarê Dêrsim, Erzîngan û Xarpêtî nê, heme cayan ra hetkarîye ameye.” Çarçewaya kampanya de 70 hezar Euro ame pêser.
PÎRHA/STENBOL