Cenazeyê PKK û YPSyîyê ke pêrodayîşanê tarîxanê cîya-cîyayan de şehîd kewtî, erşawîyenî Dezgeyê Tibê Edlî yê Meletî û ewja de yenî vindarnayîş. Nika Dezgeyê Edlî Tibî ke 20 cenazeyî tede estî rê her roje cenazeyê cîyayî yenî. Ame musayîş ke îşkence bi cenazeyê ke ewja de yî yenî kerdiş û seba ke cenazeyî hîna zaf taxrîb bibî, bi hawayo qestî cereyanê dezgeyî birnenî. Babete ser o Temsîlkarê MEYA-DERî yê Meletî Yusuf Bulutî qisey kerd û vera kerdişan de reaksîyon nîşan da. Bulutî va ‘cenazeyî nika rewşa ke nînî naskerdiş de yî’ û wina domna: “Seba ke cenazeyan teşhîs bikerî, bi seyan keyeyî yenî Meletî, labelê dozgerî ser compîturî ra fotografanê cenazeyan nîşanê keyeyan dana û bi no hawa hewl dana bida teşhîskerdiş.”
Jeneratorî nêdanî xebetnayîş
Bulutî dewamê qiseykerdişê xo de dîyar kerd ke bi no hawa keyeyî yenî mexdurkerdiş û qiseykerdişê xo de wina va: “No zî tewirêkê yê îşkenceyî yo. Cenazeyî xirab benî û boye dekewna cenazeyan. Cok ra merdim nêşêno hetê cenazeyan ra derbaz bibo. Seba ke cenazeyî taxrîb bibî, bi hawayo qestî cereyanî yenî birnayîş û destûr nêdîyeno ke jeneratorî bêrî şuxilnayîş.”
Cenazeyî Yenî parçekerdiş
Bulutî bale ant çîyê ke cenazeyan ser de yenî kerdiş ser û qiseykerdişê xo rê wina dewam kerde: “Vera xirabîyayîşê cenazeyan de çimanê xo gênî. Tayê cenazeyî mergî ra dima bi îşkence yenî parçekerdiş. Wexto ke wina yeno kerdiş, keyeyî nêşênî cenazeyanê xo nas bikerî. Keyeyî bi aşman seba naskerdişê cenazeyan yenî mijulkerdiş û no zî îşkenceyêko taybet o.”
Sucê merdimîye yeno kerdiş
Bulutî peynîya qiseykerdişê xo de qala zextê ke vera ci de benî zî kerd û qiseykerdişê xo wina qedêna: “Ez wezîfeyê xo yo merdimîye û wijdanî kena. Seba ke cenazeyî nêrî naskerdiş çi destê înan ra bêro, kenî. Teşebusê derbe yê 15ê Temmuze ra ver çend cenazeyî Dezgeyê Tibê Edlî yê Meletî de estî, malumatê ci ma reyde ameyêne parekerdiş, labelê teşebusê derbe ra dima êdî malumatê cenazeyan zî nêdîyeno ma.”
MELETÎ