Çend serranê peyênan de Gimgim, Cizîr, Sûr, Nisêbîn û sewbîna xeylê cayan de cenazeyî ameyî parçe kerdene, erdî ra ameyî kirancene, destûr nêdîya bêrî defin kerdene û sewbîna. Demo peyên de zî xeylê cenazeyî morgan de yî û cenazeyî nêdîyenî keyeyanê înan.
Parlamentera HDPyî ya Mêrdînî Pero Dundare babete ser o qisey kerde. Dundare va ‘ti bawerî de çîyê winasî nînî kerdene’ û wina domnaye: “Goreyê bawerîya Îslamî; kam kura de bimiro, ganî ewja de bêro defin kerdene. Dewleta tirkî îşkence bi cenazeyan kerde, pey panzeran ra kirantî, teşhîr kerdî û sewbîna xeylê çîyê bînî ameyî kerdene. Wazenî kurdan ra vajî ‘eke ti bimirî, ez to mezel de zî rehet nêverdana’. Bi no qeyde hewl danî kurdan teslîm bigîrî. Keyeyî nêşênî cenazeyanê xo bigîrî. Cenazeyê ke yenî girewtene, parçeyê înan kêmî yî. Keyeyî nêşênî domananê xo bişinasnî. Ganî dezgeyê heqê merdiman nînan qebul nêkerî. Labelê komelê Tirkîya ker û lal o.”
Dundare peynîya qiseykerdişê xo de va ‘kurdî goreyê heqê merdiman têkoşîn danî’ û wina domna: “Ewro tena kurdî wayîrê heqê merdiman vejîyenî. Reyna tena kurdî wayîrê demokrasîya nê welatî vejîyenî û wazenî ke wa huqûq bikewo dewre. Cok ra wazenî kurdan bêveng bikerî. Sebebê çîyê ke vera cenaze û goristanan de yenî kerdene, no yo. Kurdan ra vanî ‘yan şima bêveng benî û teslîm benî, neke ez vera şima de bi huqûqê dişmenî têgêrena.”
ANF / MÊRDÎN