CEMÎL UGUR / HAMDULLAH KESEN / MA / EDENE
Avûkatê Komela Huqûqnasanê Hemdemî Şîar Rîşvanogluyî seba ke Heyetê Pêroyî yê Baroya Edene de çekuyanê ‘gerîla’ û ‘Kurdîstan’ bikar ardî, raştê hêrişî ameyo. Rîşvanogluyî qisey kerd û vera bêvengîya baroye de reaksîyon nîşan da.
Rîşvanogluyî dîyar kerd ke o bi yadkerdişê Tahîr Elçîyî kombîyayîş de dest bi qiseykerdişê xo kerdo û dima ra wina domnayo: “Ez hedîseyê Soma û tewqîfbîyayîşê karkeranê raşteyê teyarayan ver rehet nîya. Ez nêşêna cuya xo seke çîyêk nêbîyo bidomna. Her roje Kurdîstan ra cenazeyî yenî, şima senî rehet î?”
Rîşvanogluyî dewamê qiseykerdişê xo de wina dewam kerd: “Wextê qiseykerdişî de avûkatê nîjadperestî ameyî mi ser de û heqaretê mi kerdî. Avûkatê ke mi nas kenî, kewtî mabên, labelê ê avûkatan hêrişê embazanê mi zî kerd. Avûkatanê nîjadperestan ra yewî veng da polîsan û polîsan rê ez gerre kerda. Ê nîjadperestî va ‘Avûkat Rîşvanoglu parçeyêkê welatê ma ra vato Kurdîstan û terorîstan ra zî vato gerîla û pesnê înan dayo, ganî şima gerreyê ma qebul bikerî’. Ma reya sifteyîne ya ke çîyêko winasî reyde têrî manenî. Serekê baroye Velî Kuçuk vera na rewşe de bêveng mend.”
Ma do qezenç bikerî
Rîşvanogluyî peynîya qiseykerdişê xo de wina va: “Seke na rewşe bes nêbo, îxbarvanîye, îtîrafkarîye û ajanîye yenî ferz kerdene. Îqtîdarê burjuva de hertim çinkerdişê sey Roboskê, Cizîr û Sûr estî. Beno ke ê nika seke serkewtî biasî, labelê netîce de ma do qezenç bikerî.”