Seba ke wedarîyo ganî têkoşîn gird bibo

Tecrîdo ke Rayberê Şarê Kurdî Abdullah Ocalanî ser o esto, dewam keno. Verê cû tecrîd netîceyê grevê vêşanîye û rojeyê mergî yê Hemserekê KCDyî Leyla Guvene û bi seyan hepsîyan de seba demêkî amebi wedarnayene. Labelê tecrîd 2 aşmî yo reyna dewam keno.

Babete ser o Sereka Pêroyî ya Partîya EMEPî Selma Gurkane qisey kerde. Gurkane dîyar kerde ke tecrîd huqûqî nîyo, qerarêko sîyasî yo. Gurkane wina dewam kerde: “Muameleyê esîrîye Ocalan rê yeno kerdene. Seba ke vernîya nêyî bêro girewtene, ganî têkoşînê aştî û demokrasî bêro girdkerdene.”

Aktorêko zaf muhîm o

Gurkane bale ante tecrîdî ser û wina va: “Ocalan nêşêno avûkatanê xo reyde pêvînayîşan bikero. No tewirêko sîyasî yo. Têkoşînê aştî û demokrasî do domîyayîş yan zî nêdomîyayîşê tecrîdî dîyar keno. Nizdîbîyayîşê îqtîdarî yê Ocalanî, eynî wextî nizdîbîyayîşê îqtîdarî yê Kurdan zî dîyar keno. Ocalan seba çareserîya problemê Kurdan aktorêko zaf muhîm o û hetê herkesî ra yeno qebulkerdene.”

Gurkane qala têkoşînî kerde û wina va: “No proses de berpirsîyarîyê xeylê cîddî kewenî hêzanê demokrasî û aştîye yê welatî ser. Çîyo ke keweno milê ma ser o yo ke ganî ma vernîya rejîmê yew merdimî bigîrî. Bitaybetî ganî ma vernîya polîtîkayê ke ver bi rojhelatê Firatî hîra benî de têkoşînê xo gird bikerî. Ma ancax bi no hewa eşkenî muameleyê esîrîya sîyasî yê Ocalanî wedarnî.”