Şûbeyê DÎSK yê Dersim seba protestokerdişê tayînkerdişê qeyûman û tepiştişê Hemşaredaranê şaredarîya Amed nûmayişê kar ca verdayişî viraşt.  Konfederasyonê Sendîkayê Gurekaranê Şoreşger (DÎSK) derheqê Qerarnameyê Hukmê Qanûnî ke seba 28 şaredarîyan qerarê tayînkerdişê qeyûmî de damûstayîn da çapemenî. 

Damûstayîna ke ver bana şaredarî de amê dayen, Hemşaredarê Dersim Nûrhayat Altûn, Mehmet Alî Bûl ra pîya, Parlementerê Sûk yê HDP Alîcan Onlu, Hemseroka Şûbeyê DÎSK yê Dersim  Şukran Yilmaz û pêro gurekarê şaredarî tewr bî. 

Binçimgirewtişê korsanvarî 

Hemserok Yilmaz ke damûstayîn de qisey kerd vist vîrî ke hewldayena derbeya 15ê Temûz ra dima hêrişê dûştê gurekaran ramenê.  Şukran Yilmaz da zonayen ke, hikumeta AKP hewl dana ke îxtidara xo ser xespkerdişê heqanê emegdar û gurekar ra biramno û va, iyê dê nayî bi xoverdayişî manî bikerê. Yilmaz aşkere kerd ke iyê dê tepiştişê Hemşaredaranê Sûka Pîl yê Amed Gultan Kişanak û Firat Anli qebûl nêkerê û va, ‘bi korsanvarî binçimgirewtişê Hemşaredaran, tepiştişê ci, û hewldayenê îşgalkerdişê şaredarî çilka peynîya. Nûmayiş bi çepik û sloganan qedîya. 

Tekoşîn do biramo 

Herzewbîn cayanê zey Wan, Edene, Antalya, Mêrdîn û Riha de zî damûstayîn amey dayen û vajîya ke dûştê derbeya qeyûm û tepiştişan xoverdayiş do dewam bikero. 

Wan de zî bi rayverîna DÎSKî damûstayîn ame dayen û mesajê ramitişê tekoşîn ame dayen. Edena de zî hetê rêxistina HDP yê Seyhan Parka Înonu de bi damûstayîneke tepiştişî protesto bî. Dûştê derbe jû reaksîyon zî rêxistina HDP yê Antalya ra amê. Na nûmayiş de zî vajîya ke verra hêrîşan xoverdayişê topyekun do bîro dayen.  Şaredarîya Mêrdîn û gurekaranê DÎSKî zî bi jû roj caverdayişê karî tepiştiyşê Hemşaredaran protesto kerd. Îta de zî vajîya ke, wa îxtidar bizano ke dûştê faşîzmî de iyê dê çokanê xo nimz nêkerê.

Qezayanê Riha Pirsûs, Wêranşar, Xelfetî û Bozova ke qeyûm erzîya de zî hêrişê AKP protesto bî. Damûstayîn de hayr ancîya konseptê herb yê AKP ser û mesaja ‘Kurdistan do faşîzmî rê bibo mezel’ dîya. 

Îzmîr de zî Quwetanê Demokrasî û Haştî kombîyayişê çapemenî viraştî. Damûstayîn de vajîya ke tepiştişê Kişanak û Anli dûştê kesê ke Tirkîye de hetkarê demokrasî, haştî û emegîyê jû tehdîdo û wazîyeno nê çormeyê bîrê bêvengkerdiş. 

Tenya Kurdistan û Tirkîye de nê, teberê welat de zî bi nûmayişan derbeya AKP protesto bî. 


 NAVENDÊ XEBERAN