Nê komê seba Kobanê hetkarîyê, ser Facebookî bi şîara ‘Seba YPG/YPJî çek, pawiyayişê yew komeleya azad rê bexş bikerê’ destpê kampanya kerd û na kampanya zî elaqayeke zaf gird veynena. Na kampanyayê zî sazîyê ARAP, Nao Berlîn û Perspektîve Kurdistan virazenê û nê sazîyan bi hembarî de seba çi na kampanyayê viraştî, bi nameyê ‘Qey YPGî rê kampanyaya çekî, 8 pers 8 verpers’ de day famkerdişê.
FINAKA EL SALVADOR
Nê sazîyan di şaristanê Berlîna Almanyayê lokalê Mosaîkî de çapemenîya aşkera da. Nê sazîyan vatê ke hetanê nika 30 hezar Ewro hêzê YPGî ra eşrawitê û wina vatê: “Ma xo ra edetîya paştîdayişê Enternasyonalê gênî, çimkî di dema vîyarteyî de seba Vîetnam û El Salvadorî zî 5 mîlyon Mark ameybi komkerdiş. Armancê ma, tena hêzê YPG/YPJî ra hetkarîdayiş o, çimkî nê hêzê kurd tena wazenê verba çeteyê DAIŞê têkoşîn bidê. Hewna di Rojawan de bi seferberîya şarê, şoriş ameya înşakerdiş, çi heyfo ke Tirkîya no modelê ra neyarî kena û sînorê xo qefelnayo, no ser zî di na rewşî de hetkarîdayiş bê îmkan o. Ma wazenê no qirkerdişê peynî bibo û no ser zî ma destpê na kampanyayê kerd.”
ALMANYAYÊ RA VENG
Hewna di aşkerayê de ame vatiş ke di 3 teşrîne 1980’ê rojnameyê TAZî seba gerîlayê El Salvadorî çeke bêro girewtiş, bi kampanyaya ‘Seba El Salvadorî kampanyaya çekê’ wendoxan xo ra veng daybi û wina domnay: “No demê na kampanyayê ra heme komê çepgirî hetkarî danê û 5 mîlyon Mark kom kenê. Çalakîyeke yenî kerdiş di pêroyina şarî de agahî yenadayiş û no ser zî di mîyanê şarî de têgêrayiş destpê keno. Zatî têkoşîna El Salvadorî zî bi serfiraz peynî beno.”
Berpirsîyarê kampanyayê Mîchael Prutz dîyar kerd ke tena di Rojawan de xoserîya demokratîk ameya înşakerdiş û tena di noca de azadîya cenî û zeypê ya merdimatî yena pawiyayiş, no ser zî heme merdimê Rojawan bipawê YPG/YPJ têkoşîn danê û wina domna: “Ma rotiş û girewtişê çekê nêkenî, ma tena çekan kom kenî û hêzê şarê Rojawanî YPG/YPJî ra teslîm kenî. Na kampanyayeke ma destpê kerd, na kampanyayê ma, sembolî nîyo û hîna derg verdewam bikero. Çi heyfo ke kurdan hîskenî ke seke tena amey veradayiş la şerwanê kurdan qet moralê xo xirap nêkenî û verba çeteyê DAIŞî têkoşîn danê la belê verba çeteyê DAIŞî hîna çekê giran lazim o.”
ASTENGÎYA DEWLETAN
Prutz destnîşan kerd ke înan di mîyanê 9 rojê de 4 hezar Euro pere kom kerd û rojê peynî zî pereyekê kom kerdî deshezaran resayo û 14 citmengî ra 36 hezar Euro pere ame komkerdiş la belê 6 hezar Euro pereyê Bankayê Postbank pereyan kesekê bexş kerdî înan ra tepa eşrawito û no biryarê bankayê zî biryareke sîyasî yo.
Prutz wina vat: “Ma qet do na kampanyayê xo ra tepa gam nêerzî û ma newe yew konto biakerê û şarê Berlînî zî eşkenê kampanyayê hetkarî bidê. Ma hetanê nika 30 hezar Euro pere hêzê YPG/YPJî ra eşrawit. Êdî hêzê YPG/YPJ eşkenê nê pereyê reyde lazimeya xo biveynê. Na kampanyayê ma legal o û YPG zî rayvistişeke legal o û her kes eşkeno bi rehet bexş bikero. Nika Kobanê ra çeteyê DAIŞî hêrişê xo bi çekê giran kenî la belê verba no rewşî tay dorûverî çalakwanî tena çalakîyê pasîfîzm de israr kenî. Ma ganî hetkarîyeke şenber bikerê. Ma nêeşkenî verba no qirkerdişê çimê xo biqefelnî. Merdim nêşkeno şarêke nika di binê teluke ya qirkerdişîyê de no şarê ra tena vengê prensîpe bikero. Ma no rayîrê qebul nêkenî.”
KAMPANYA HERA BENA
Prutz ciresna ke înan tena di Almanyayê de xebat nêkenî, înan nika di welatê Swêd û Norvecî de dorûverî çepgîrî reyde têkilî ronay û înan bawerekê do nê dorûveran zî na kampanyayê ra hetkarî bidê û wina qedîna: “Di Almanyayê de partîya Çep eşkena bi çalakîyan, hetkarîya kurdan rê hukûmatî ra tade bikero. Hewna hetgirê taxima SV Babelsbergî zî hetkarî, na kampanyayê dayê. Her ke şona na kampanya hera bena.”
ŞERVAN UCAL/ DARMSTADT