Gerîlayê ke Şengal de yê, derheqê Rojbîyayîşa Rayverê Şarê Kurd Abdullah Ocalan’î de ANF rê qisey kerdî. Gerîlayan aşkere kerdî ke hedefê înan serbestîya Ocalanî ya.
Gerîlayan ra Bager Cudî’yî hayr ant şert û mercanê 18 serran yê Ocalanî ser û va, ‘Hedefê ma serbestîya Rayver Apo ya’. Çike serbestîya ey, serbestîya Kurdistan û pêrokîn şaranê bindestan a.’
Eser Aras’î zî vist vîrî ke 4ê Nîsane, seba şarê kurd roja newe ra bîyayîşî ya. Aras’î aşkere kerd ke 4ê Nîsane seba pêrokîn însanîyetî roja bîyayîşî ya û qiseyanê xo wina domna: “Ma na roje zey rojbîyayîşa xo vînenê. Bîyayîşê Rayver Apo seba cinîyan zî bi omidê xelesnayîşî. Resyayîşê merhaleyê serbestî yê cinîyan û şaran de emeg û têkoşînê Rayver Apo’yî zaf o.”
‘Seba şaranê bindest omid o’
Gerîlayan ra Çekdar Tolhildan’î zî hayr ant maneyê 4ê Nîsane ser û aşkere kerd ke 4ê Nîsane seba şarê kurd yew mîlad û dewrêko newe yo. Gerîla Çekdarî dîyar kerd ke fikrê Ocalanî seba şaran bî çimeyê omidî û wina va: “Çike fikir û felsefeyê Rayver Apo’yî seba şaranê bindest bî rayê xelesyayîşî. Nayî ra ganî pêrokîn şarî seba serbestîya Rayver Apo têkoşîn bikerê.”
Heta ke azadîya ey…
Zîlan Çekdar zî da zonayen ke 4ê Nîsane; seba cinî, gerîla û şarê kurd yena maneya ciwîyayîşa newî. Çekdar dîyar kerd ke zey lejwanê azadîye, Şengal de pêşwazî kerdîşê 4ê Nîsane seba înan zaf bi mane yo. Gerîla Zîlan vist vîrî ke xelesnayîşê Şengal’î xeyalê Ocalan’î bi û qiseyanê xo bi nê vatenan qedêna: “Nayî ra, seba caardîşê xeyalanê Rayverîye, tîya de bîyayîşê ma, seba ma zaf bi erjaye yo. Têkoşînê ma heta ke Rayver Apo serbest bibo, do dewam bikero. Ez na roja bi mane, pêrokîn şaranê Kurdistan û dinya rê bimbarek kena.
ANF/ŞENGAL