Elewîyê Textecî yê Torosan bi program û aktîvîteyê yorukan ameyîşê wisarî pîroz kenî. Dewijê elewî yê ke dewa Kizilkaya de gureyê îzimekarî kenî, şert û mercê zimistanî de muneqaşaya referandûmê 16ê Nîsane domnenî. Elewîyê Textecîyê Torosan ra Oktay Armutoglu û Huseyîn Karayî qisey kerdî.
Armutogluyî qiseykerdişê xo de va ‘elewîyê Textecî yê Torosan bedilnayîşê qanûno bingeyî ra bawer nêkenî, cok ra tercîhê xo hetê ‘nê’yî ra xebetnenî’ û wina dewam kerd: “Îngilistan de qanûnêko nuşteyîn çin o. Labelê reyna zî weş îdare beno û sey finak yeno dîyayayîş. Çareserkerdişê probleman bi demokrasî mumkin o. Mesele qanûno bingeyî nîyo, sîstem o. 10-15 serrî yo ke welatê ma de pawitiş kêmî bîyo. Her wext bêaramî û lej estî.”
Pawitişê şaran nêmendo
Karayî va ‘bajaran de pawitişê merdiman nêmendo, ma vera îqtîdar de yî’ û qiseykerdişê xo wina qedêna: “Mîyanê madeyê ke yenî bedilnayîş de seba şar, kedkar û tebîetî çîyêk çin o. Cok ra ma referandûm de do vajî nê. Ganî bedilnayîşê madeyan bi hawayo demokratîk û hîrayêr bibo.”
DÎHABER / MERSÎN