Seba Kongreya Neteweyî bi serran o ke xebatî yenî kerdiş, her çiqas ke no het de xeylê rayîr ame girewtiş, reyna hema zî vernîya yewîye de astengîyî estî.
Endama Konseyê Caardişî yê Kongreya Neteweyîya Kurdistanî (KNK) Perwîn Ezîze û Endamê Dîvanî yê KNKyî Faruk Cemîlî derheqê yewîya neteweyî de qisey kerdî û fikrê xo vatî.
Endama Konseyê Caardişî yê KNKyî Ezîze va ‘bi serran o kongreya neteweyî ser o xebatî yenî kerdiş’ û wina dewam kerde: “Na rey ma seba yewîye biomid î. Ma sey KNK vengdayîşo ke seba kongreya neteweyî kerd, ma eynî wext de xebatê fermî yê yewîya neteweyî zî da destpêkerdiş. Ma xebatanê xo yê verênan ra dersan vejenî û bi no hawa xebetîyenî. Na xebate seba çar parçeyanê Kurdistanî yena kerdiş. Nika xebata ma Başûrê Kurdistanî de dewam kena. Na rey omidê ma esto ke do stratejîyêko newe bêro averberdiş.”
Heme parçeyan de pêvînayîş
Ezîze dewamê qiseykerdişê xo de qala xebatanê xo kerde û wina va: “Ma çarçewaya xebatanê xo de hedef kenî ke Başûr, Vakur, Rojawan û Rojhelat de heme partîyanê sîyasîyan reyde pêvînayîşan bikerî. Ma seba nê pêvînayîşan komîteyî awan kerdî. Badê ke heme pêvînayîşê ma qedîyayî, ma do platformêko ortax de munaqeşeyan bikerî. “
Programêko ortax
Cemîlî zî va ‘ma do sey KNKyî seba Kurdistanî programêk amade bikerî’ û wina dewam kerd: “Ganî stratejîyêka ortaxe ya kurdan biba. Seba ke şarê ma bireso hedefê xo, ma xebatêka winasî dayo destpêkerdiş. Ma hedef kenî ke nakokîyê ke mabênê partîyanê kurdan de vejîyayî, orte ra wedarnî. Çimkî ma zanî ke şarê kurd nika têkoşînêko gird dano, labelê tekoşîno ke parçeyîn o. Ganî nê firsendê ke Rojawan, Başûr û Vakur de ameyî ma ver, ma bi hawayo baş bigîrî dest. Ma sey KNKyî vanî ganî ma nê babetan de bibî yewe.”
Lazimîya şarî esta
Cemîlî va ‘lazimîya şarî bi yewîye esta’ û wina domna: “2013 de zî xebatêka winasî ameybî destpêkerdiş. Labelê çi heyf ke netîce nêgirewt. Labelê mabênê ê rojan û ewro de bedilîyayîşî estî. Nê bedilîyayîşî tena yê ma nîyî, bedilîyayîşê ke herême de benî zî estî. Ewro lazimîya şarê ma bi yewîye esta. Waştişê şarê ma yo esasî yewîye yo. Reyna zî beno ke mabênê tayê partîyan de cîyayî bibî. Labelê nika seba ke ma bişînbî stratejîyêko newe de xebate bikerî, hewl danî.”
ANF/SILÊMANÎ