Seranê pêyenan de tayê Hunermendanê ma, zonê asîmîlasyonî cuyê xo ra veto û Hunerê xo bi Kirmanckî îcra kenê. Tayê Hunermendê ma kî, hêdî hêdî gaman erzenê û bi zonê xo sanatê/hunerê xo îcra kenê. Hûmara nê Hunermendan roj bi roj bena zêde. Helbet  ma kurdî kî bi na rewşa hunermendanê xo benême kêfweş. Bêşik, Îmam û Pinare kî , nê hunermendanê ma ra yê.  Bi desturê şima, ez nê Hunermendanê ma, şima rê bidêrî naskerdene/şînasnayene.


Ma bi xêr dî birêz Îmam û Pinar xanime. Gelo şima şîkînê xo, seba wendoxanê rojnameyê Yenî Ozgur Polîtîka bidêrê naskerdenê. Îmam Özgûl kam o, Pinar Özgûl ê kam a?

Îmam Ozgul:  Xêr mîyan de be bira îbrahîm, ti xêr ama.  Verêcoyî seba ke Yenî Ozgur Polîtîka na îmkane da ma, bi raştî ma bîme kêfweş. Bi na wesîla, ma kedkaranê O.P pêroyîne rê zaf teşekur kenîme. Ez sera 1970 ye de, dewa Gimgimî Hemuge (Kuçuk Tepe) de, maya xo ra bîya. Bi raştî domantîna mi rindek derbaz bîyê, çimke qarûkesretanê dinya ra durî bîya, kêf û refê xo de bîya. Dewe de cuyê însanî zaf naturel (xozayî) o, hêya hacêtê teknîkî çînê bî, lê hewcê kî nêbî. Seba ke goşdarîya Radîoyê Erîwanî û vengûwajî bikerîme, pîyê mi ma rê jû radîo guret bî. Vengûwajî ra qederî ayê kî wacim nêkerdêne. Çimke ma şorirane çolûçolistanan de bîme, û şandane kî dengbêjan kilamî lornêne, Şanikberan kî şanikî vatêne ma rê. Bi kilmîye cuyê dewe zaf rindek û rengên bî.

Pinar Ozgul: Xêr mîyan de be kek îbrahîm, ez kî dewa Gimgimî Şorika Silêmanê Aslanî (Tuzlu Köyü) de ama  dinya. Domantîya mi dewe de derbaz bîye. Ez hetanî 6-7 serî bi zone maya xo bîya pîl, zonê Tirkkî mekteb de musa.


Gelo şima çi taw (wext) dest kerd bi muzîkî?

Îmam Ozgul: Bi raştî ez zaf binê tesîrê dengbêjanê Radîoyê Erîwanî de mend bî.  Saya ê dengbêjan ra, eşqê muzîkî ê zerîya mi de zîl da bî. Mi vaştêne ke tembur bicinî û kilaman vajî. Lê çi hêf ke temburê mi çînê bî. Rojê mi ê rê kî çarê dî û hurêndîya temburî de bi gezik  dest pê muzîkî kerd. Sera 1984î de maya mi û Pîyê mi mi rê jû temburêde şîkîyaye guret û bi ê, ez hêdî hêdî tembur cinitene kî musa. Tabî bi a qeyde roj bi roj bi kilam û deyîranê ma vatiş û tembur cinitene de bîya aktîv.  

Pinar Ozgul: Hêna ke ez 13-14 sere bîya, bi muzîkî hênî alaqadar bîya, ke mi vatêne “Seba ke ez profesîyonel kî  dest bi muzîkî bikerî, ya ez tembur cinitene musena, ya kî jûyê sazbendî de zewecîna...” Bi kilmekîye, xêyalê mino verên muzîk bî. Çunke mi xo kilaman û deyîranê ma de dîyêne. Gorê mi muzîk, axwa heyatîya însanan a.  


Şima jûbînî se naskerd û qerarê zewecîyene çi taw da?

Pinar Ozgul: Zê ke mi corde qalê wadê xo kerd bî, îşte a roje amay bî. Rojê Îmam bi temburê xo amay bî dewa ma. Dewe de ma rê  tembur cinit û kilamî vatî. Bi raştîye ez a roje bîya aşiqê vengê îmamî û temburê îmamî.  A roje ra dime, ma jûbînî de kewtîme tekîlîyê û pêycoy zewecîyayîme.  Zewacê ma ra dime, sera 1995î de ez ama leyê Îmamî Almanya. A sere ra nat tîya de cuyê xo ramenîme û muzîkî ser ro xebatê xo berdewam kenîme. 


Sera 2005î de organîzê kerdoxanê Festîvalê Gimgimî, şima silaynayî bî. Şima ê Festîvalî de hem bi Tirkkî, hem kî bi Kurdkî-zafêrî bi Kirmanckî kilam vat bî.  Gelo şima çira giranîye da bî Kirmanckî ser.


Îmam Ozgul: Zonê ma zaf sêwî mendo, hem sêwîtîya zonê ma jan dêne astikanê ma, heto bîn ra kî bi raştîye zonê ma zonê muzîkî yo. Ma nê di sebeban ra a roje ra nat programanê xo de giranîye danîme zonê ma. 

Pinar Ozgul: Mi gorê, însanî ke zonê xo kerd vîndî, şexsîyetê xo û xo kî tey keno vîndî. Însano bêzonê maya xo, zê kengerê huşkî yo. Vayî dest de beno belengaz, çimke vayî kamcî hetî serde siripna ê kî ê hetî serde beno, dêsan serde erzeno, silondan serde şeqetneno. Bi kilmekî beno bêşexsîyet û beno kayê destê şaranê bîna. Aye ra gereke însan verde xo bo. Bi vatişêde binî, însano bêzonê maya xo, beno ke bibo walî, bibo tixtor, bibo hunermend hama ponc perê nêkeno, çimke xo nîyo sexte wo. 


Şima va ke „Şahîyan, şewan û konseran de ke ma  vejîyayîmê sahna, zêdêrî bi kirmanckî kilamanê xo vanîme!“ Gelo şima ke zêdêrî kirmanckî klamî vatî, goşdarê şima reaksîyonê senên musnenê şima.


Îmam û Pinar Ozgul: Çiqas ke gegane reaksîyonanê negatîvan kî bicîme, sed ra newaye prosent kî reaksîyonanê pozîtîvan cênîme. Her konser, şewe ra dima miheqeq şarê ma eno leyê ma û zerêweşîya xo ano re zon. Şarê xerîbê ke zonê ma nêzanê, xelî wext ê kî yenê leyê ma û vanê “No muzîkêde çi balkêş o, ke bi vatişê şima porê sereyê ma reqesîya.” 


Şima,  “Şewa Dengbêjan” a ke hetê Komela Gimgimî yê Berlinî ra amay bî organîze kerdiş de kî ca guret bî.  Mi a şewê de zaf zelal dî, ke şarê ma bi zonê ma beno kêfweş. Alaqayêde zaf rindeke musnê şima. Zaf kilmek, şima a şewe  de çi hîs kerd?


Îmam û Pinar Ozgul: Bêşik, şewêde zaf balkêş bîye.  Komela Gimgimî rê zaf teşekur kenîme. A şewe de dolimêna bî eşkera ke şarê ma êndî zonê xo de kilaman wazeno. Ma seba alaqaya şarê ma teşekur kenîme.  Zonê xo rê wayîr vejîyayişê şarê ma, ma zaf kerdîmê bextewar.


Seba şarê ma û Yenî Ozgur Polîtîka vatenêde şima est a?

Îmam û Pinar Ozgul:  Sereyê hardan de seba zon û kulturê xo, kesî qasê ma kurdan berdêl nêdo. Gereke ma kurdî bi roşnvîranê xo, bi sîyasetmedaran û bi hunermendanê xo pêropîya vajîme êndî bes o, û  zonê asîmîlasîyonî cuyê xo ra vejîme.  Bêşik, rojnameya ma O.Polîtîka kî bi ked û emegan û bi berdêlanê giranan amê ronayene. O.Polîtîka rê wayir wejîyayiş, xo rê wayir vejîyayiş o. Bi na wesîla dolimêna kedkar û emegdaranê O. Polîtika pêroyîne rê serfirazîye wazenîme. Bêguman, karêde zaf fîrazî kene. 


Seba nê reportajî ez şima rê zaf teşekur kena û karê şima de, şima rê serfirazîye wazena. Weş û war bê.

Îmam û Pinar Ozgul: Ma kî  to rê zaf teşekur kenîme.  Rind ke O. Polîtika est a.



ÎBRAHÎM BEYAZ/BERLÎN