Meclîsê Ewleyîya Karî û Weşîya Karkerî (ÎSÎG) raporê xo yê 2016 amade kerdbî û goreyê raporî serra 2016 de 1970 karkerî merdî û rapor de bi hezaran neheqîyî ca gênî.
Babete ser o Pisporê Ewleyîya Karî û aktîvîstê ÎSÎGî Selçuk Kastarliyî û endamê Meclîsê ÎSÎGî yê Stenbolî Murat Çakirî qisey kerdî.
Karstarliyî va ‘wexto ke merdim raporî ra ewnîyeno, vîneno ke cayê karî ke kesêk ra heta 50 kesî tede xebetîyenî, nê cayan de mergî hîna zaf bîyî’ û qiseykerdişê xo wina domna: “Ma paweyê ke dewlet kesê zeyîf û yê ke neheqî bi înan yeno kerdiş, bipawo, labelê mergê karkeran sey qeder û fitrat yeno dîyayîş. No nîno qebulkerdiş.”
Her serre 2 hezar karkerî mirenî
Karstarliyî dewamê qiseykerdişê xo de va ‘seba xebatêka biewle tena çend bedilîyayîşê teknîkî bes o’ û wina dewam kerd: “Tirkîya de hewtane ganî saetê xebatî 54 saet bibî, la 72 saet yenî xebetîyayîş. Hukmat ewleyî û weşîya karkeran ra berpirsîyar o, labelê hukmat herinda karkeran karmendan pawena. Vatişê ‘fitratê karî de esto’, ‘mi dî weş merdbî’ û ‘şima kar kenî ganî şima netîceyê ci biancî’ zî cok ra yenî vatiş. Her serre nizdîyê 2 hezar merdimî cînayetê karî de mirenî. Eke herinda karkeran de karmendêk bimerdêne, wina bîyêne.”
Hesabê ci nêdanî
Çakirî zî va ‘seba ke berpirsîyarî hesabê ci nêdanî, cînayetê karî zêde benî’ û qiseykerdişê xo wina qedêna: “Soma û Şêrwan de cînayetê karî bîy, kam şîna se kero. Yê ke qerar danî, nînî mehkemekerdiş û ceza nêdîyeno înan. Reyna wezîr û burokratî ceza nêgênî. Yê ke bî sebebê 301 kesan, ti ceza nêgêno.”
DÎHABER / KOCAELÎ