Cizîra Botan de terora dewleta Tirk û xoverdayiş roja 30. de rameno. Çeteyê AKP yê ke nêşenê xoverdayişî bişikînê, sivîlan hedef gênê. Cizîr de 2 rojanê peynî de 8 sivîlî kişiyay.
Dewleta Tirk serva ke Cizîra Botan teslîm bigîro herbê do leymin-qilêrîn ramena, pêrokîn hetan ra êriş kena. Taxê Cûdî, Nûr û Sûr yê Cizîr, didi rojiyo danê tanq û topan ver. Mehleya Sûr de, fîşega top îsabetê jew dikanê tûpan kerd û rijina.
Cizîrijî vejiyay meydanan
Tanqê ke Tepeyê Caferî Sadik de bi ca biyê zî, mehleya Cûdî hedef gênê û hetanî nika bi desan keye rijinay. Mehleya Nûr zî rastê êrişanê bi topî yena. Quwetanê dewlet ê ke wazenê bikewê zerreyê mehleyan, rastê xoverdayişê quwetanê YPS yenê. YPS vizêr nê perey mehleya Nûr de, jew cîhazê Dron vist war.
Vizêr ver mehleya Cûdî welatijan serva girotişê cenazeyan, destbi rayşiyîn kerdî. Nûmayişo ke Parlamenterê HDP yê Şirnex Faysal Sariyildiz kî tewr bî de sloganê “Bicuw xoverdayişê Cizîr”, “Şehîd nêmirenê” berz bî. Hemserokê Meclîsê Şar yê Cizîr Mehmet Tûnç’î tiya de qiseykerd û va, ê domanê ke şima bi benaneyê ‘eştişê kemer-sî’ tepiştî, nika ê pey barîqatan de xover danê. Tûnç’î da zonayene ke, çiyê ke Cizîr de benê, eserê dewleta faşistîn yê Erdogan’î yê.
Dewlet mecbûra peyser bianco
Xoverdayişê qezaya bîn yê Şirnex, Silopî zî 30 rojî pey xo de terna. Silopijan veng da dewleta ke, bi tanq û topan banan rijnena û vatî, “Tiya yê ma yo, peynî de iyê ke tiya ra şirê qûwetê dewletî yê.
Qeza de, çeteyanê dewleta Tirk 29 rojan de, 25 sivîlî kiştî. Serva ke, Silopî veng-tol bikerê, roja sifte ra heta na het, elektrîk û awî birna. Dustê heme êrişan şarê Silopî xo ver dano û qerardarînê xo ano ziwan. Silopîyijê vanê, ‘dewlet heme banan birijno zî, peynî de iyê ke tiya terk bikerê, quwetê dewletî yê.
KJA , serva wayirtvetişê xoverdayişê Cizîra Botan, waşt Sêrt ra hetê Cizîr û Sîlopî ray şiro. La nûmayişê KJA dekewtişê Sêrt de ame manîkerdin. Ser nayî KJA qerar da ke, ser Mêrdîn ra şiro Şirnex.
NAVENDÊ XEBERAN
Verra Sûr pêro artêş visto dewre
Qezayê Amed Sûr 42. rojiyo verra herbê qilêrîn û hêrişanê teslîm girotişê dewleta Tirk xover dano. Dewlet bi hezaran polîs, tîmê teybet, cendirme, komando, qoricî, tanq û topî visto dewre û êriş kena. Rexmê pêrokîn qûwetê xo, dewlet xeylê vinîyişan dana.
Esker û tîmê teybet kirêşiyay
Vizêr sodir de zî ronişteyanê Sûr, bi hêrişan destpa roj kerdî. Quwetanê dewlet bi tanq û topan xeylê keyeyê çormeyê Camiya Kûrşûnlû hedef girotî. Peyniyê êrişê bi tanq û topan de, xeylê banî rijiyay. Nezdiyê mektebê Suleyman Nazîf de zî, vengê 2 teqînayinan ame. Tîmanê taybet mehleya Fatîhpaşa da ver fîşegan. Tanqê ke mektebê Mardînkapi yê mehleya Hasirli de bi ca biyê zî, keyeyan hedef gênê.
Heta bîn ra, dewleta Tirk qandê ke, ebi tanqan bişero dekewo mehleyan, bi kepçeyan banan rijnena. Eynî wext de helîkopterê lejkeriyê zî, bê maben ser Sûr de geyrenê. Jew guleyê tanqî îsabetê Merkezê Kiltûr ê Dîcle û Firat’î kerd.
Goreyê zonayişanê mehelî, xeylê esker û tîmê teybet yê dewlet amey kişten. Dewleta ke, rexmê pêrokîn hêrişan nêşa îradeyê Sûr’î bişikîno, vizêr zî verra qeza sewqiyatê tanq amey kerdin.