Rojavayê Kurdistanê zaf gan û gonî kewna ser erdê. Laserê gonî virazîyo.
Erdê Rojavayê Kurdîstanê pê gonîyê kêna û lajên egîd û rindekan yeno awdayîş.Ca ca hilqekek hina kewno qirekê yewî û yew neşkeno nefes bigero.
Ca ca zî yew hina beno ke hilp-hilpe bermayîşê yewî yeno, la yew şermayeno, hesirê yewî hêdî û hêdî çimanê yewî ra yenî.Yew wazeno vajo ke, Beso beso Ey Rojava to hindê gonîyê ma girewta!
Hetê bîn ra zî yew ewnêno ke, welat bê gonî nêyeno azadkerdiş.Erdê Rojava zaf gan û gonîyê ciwanan girewto. Nê gan û gonî tena yê ciwananê Kurd nîya.Ciwanê Ereb, Çerkez û Tirk zî şehît kewnê. Vanê şarê kurd şarêk mazlum o, wirzenê û kiştê ciwananê kurd de ca genî û kewnî mîyanê şer. Hemberê çeteyên DAÎŞ’ê şer kenî.
Tayê înan Awustralya ra wiştê verê xo dawo Rojavayê Kurdîstanê. 12 hezar km welatêk dûrî ra ameyê seba şarê kurd şerkenî.
Yewê înan zî Şehîd Bagok yê bi name Asley Kent Johnson bi. Awustralya ra wiştê ser lingan, verê xo da Rojava. Huyayîşê eyê ver çîman ma ra nêşino. Çi weş û hol huyenê. Vatenê, “Mi dî şarê kurd hono bin zulmê dagirkeran ze DAÎŞ de, vîjdanê mi qebûl nêkerd. Seba ayê ez ameya beşdarê YPG bîya”. Şehîd Bagok pê nê bengîyan şer kerd. Şerê Til Hemis de şehîd bi.
Vanî, şehîdbîyayîşê eyê zî bi qehremanî bîya. Yew panzerê YPG kewna mîyanê çeteyên DAÎŞ’ê, Şehîd Bagok ewnêno hina şîyero ê şervanên YPG pêro şehîd bibenê. Panzer ra yeno war, şer keno, hevalê eyê xelas benî, o şehîd kewno. Pê xo ra ma ra yew mîras vereda. Mîrasê azadî, bi huyayîş şerkerdiş. Bi huyayîşê azadî ewnayîş.Tena Şehîd Bagon ne, Şehîd Kemal yê bi name Konstadinos E.Scurfield zî egîdêk bîn bi. Yew eskerê Înglîstanê bi. Fek eskerîyê Îngîlistanê ra vere da, şi beşdarê YPG bi. Tim û tim verênî de şer kerd. Til Berak de şehîd bi.
Yew egîdêk bîn bibî. Name ayê mîyanê YPJ de Avaşîn Tekoşîn bi. Name aye keye zî Ivana Hoffman bî. MLKP’yî bî. Bajarê Almanya Duîsburg ra şî û şî xo resna Rojava. Til Temir de şer kerd û şehît bî.
Nê şervanên enternasyonel xo seba şarê kurd û însanîyet feda kenî. Xo ra hema hema pêronê înan vanî, şerê YPG û çeteyên DAÎŞ’ê tena şerê Kurd û yê çeteyên DAÎŞ nîyo.Çeteyên DAÎŞ’ê dişmenê pêronê însanîyetê. Şarê Kurd zî seba pêronê însanîyet hemberê çeteyên DAÎŞ’ê şer keno.Wexto ke yew na raştî bivîno û bê veng bimano, qet û qet nêbeno. Ucaxî wijdan ça de maneno, exlaq ça de maneno.Pêronê înan bi nê bengîyan heyatê xo yê şexsî ra fek vereda, hina hemberê çeteyên DAÎŞ’ê şer kerd.
La tayê ciwanê Kurd yê Rojava zî fek welatê xo ra veredanî û remenî yenî Ewropa.
Yew înan ra vajo Kurdê raşt nêbeno, bena xeletî.
Wa ayê hina şerm bikerenê.
Wa bi ewnê Şehîd Avaşîn Tekoşîn, Şehîd Bagok û Şehîd Kemal şerm bikerenê.