Selîm da zanîn kû, hilbijartinên xwecihî yên 30’ê Adarê li Bakûrê Kurdistan û Tirkiyê ji bo gelê Kurd gelek giringe û wiha pêde çû: “Hilbijartinên xwecihî di heman demê de eşkerebûna çarenûsa pêşveçûna pêvajoya aştîyê ya ji aliyê Ocalan ve ya di navbera dewleta Tirk û aliyê azadîxwaz yê Kurd de hatiye despêkirin de ye. Bi taybet jî ev hilbijartine ji bo şaredariyên li Bakûrê Kurdistanê yên ne di destê BDP’ê de xwedî giringiyek bê hempaye û divê gelê Kurd vê carê îrada xwe ya azad nîşan bike û şaredariyên xwe ji destê partiyên ne Kurd derbixe. Ji ber girîngiya hilbijartinên 30’ê Adarê pêwîstiya gelê me yê Bakûr bi piştgiridayînê a ji aliyê partî û gelê parçeyên din yên Kurdistanê heye."


´Ji bo aştiyê hêz girîng e´
Selîm li ser navê partiya xwe piştgiriya xwe ji bo BDP’ê nîşan da û wiha got: “Lewra em wek Partiya Zehmetkêşên Kurdistanê daxwaz û hêvî dikîn ku gelê Kurd yê Bakûrê Kurdistanê di vê hilbijartinê de bikare tevayî şaredariyên xwe bi dest bixe. Bi vî awayî Kurd bikarin bibin xwedî îradeyek azad, bihêz û bikaribin bandora xwe di parlementoya Tirkiyê û pêvajoya çareseriya aştiyê de pêkbînin û rolê xwe yê dîrokî bileyzin. Ji ber vê jî em piştgiriyê didîn Partiya Aştî û Demokrasiyê BDP’ê.”

Têkiliyên PDK û AKP´ê
Selîm derbarê serdana Serokê hikûmeta Herêma Kurdistanê Nêçîrvan Barzanî ya Tirkiyê û peymanên ji bo vekirna deriyên sinor yên di navbera her du aliyan de, da zanîn ku, demek dirêje di navbera Herêma Kurdistanê û dewleta Tirkiyê de têkiliyên aborî hene û wiha got: "Sermayeya têkiliyên aborî û bazirganiyê ya di navbera Tirkiye û Kurdistanê de digehe 12 milyar Dolarî. Ji sedê 70’yê vê sermayeyê li bajarên Hewlêr, Silêmanî û Duhokê ye. Ev têkiliyê li gorî berê hîn zêdetir pêşketine û bandora xwe li têkiliyên siyasî yên di navbera her du aliyan de dike. Ev têkilî zêdetirê xwe li ser bingehê aborî û bazirganiyê ye.”

'Divê di xizmeta gel de be´
Selîm, balkişand ser vekirina deriyên sinor yên di navbera Tirkiyê û Herêma Kurdistanê de û got; “Hikûmeta Kurdistanê ya kabîna heştem ne hatiye avakirin û serokê parlementoyê jî ne hatiye hilbijartin. Her çendî ku nêzî şeş mehan li ser hilbijartinên Parlementoya Herêma Kurdistanê re derbaz bû, lê hîn serokatiya Parlementoya Herêma Kurdistanê nehatiye hilbijartin. Ev hikûmeta li gorî mafên destûrî her çendî ku bi temamî nebe jî dikare li ser navê hikûmetê peymanan îmze bike û biryarên têkildarî çarenûsa herêmê bide. Herwisa bi taybet divê di xizmeta pêvajoya çareseriyê ya li Tirkiyê di navbera dewletê Tirkiyê û aliyê Kurd de hatiye destpêkirin de be.”

DÎHA/HEWLÊR