Leyla Qasima ke tarîxê têkoşînê kurdan de şexsîyetêka muhîm a, seba ke vera dîktatorîya Îraqî de xover daye, ameye îdamkerdene û îdambîyayîşê aye ser ro 45 serrî derbaz bîyî. Leyla Qasima ke tarîxê têkoşînê cinîyan de reya sifteyîne ameya îdamkerdene, cinîyanê bînan rê bîya sembol.
Leyla Qasime 1952 de dewa Bamîlî ya Xaneqînî de yena dinya û domana 3. ya keyeyî ya. Dima ra keyeyê Leyla koçê Bexda keno û Leyla ewja de beşê Komelnasî qezenç kena. Leyla hîn 20 serrîya xo de Yewîya Wendekaranê Kurdîstanî (YXK) şinasnena. Leyla seba ke meqaleyêka ke qala dişmenîya Sedamî kena, nuşta, bena hedef.
Leyla demêko kilm de mîyanê YXKyî de bena aktîf û wendekaranê bînan ser o tesîr kena. Leyla eynî wextî de vera zîhnîyetê ‘têkoşîn karê camêrdan o, cinîyî nêşênî beşdarê têkoşînî bibî’ de tewr vernî de cayê xo têkoşînî mîyan de gêna. Serra 1974î de rejîm Qeladiz ser o bombeyan varneno û netîceyê bombeyan de 3 kesî mirenî. Leyla Qasime vera nêyî de 24ê Nîsane de teyara remnena. Labelê tîya de sernêkewena. Leyla û embazê xo Bexda de yenî tepiştene.
Wa gêsanê mi ra beyraqe virazî
Leyla netîceyê mehkemekerdişî de cezaya îdamî gêna. Leyla îdambîyayîşê xo ra ver dayîka xo reyde pêvînayîşêk kena û aye rê wina vana: “Dayîka min a delale, seba mi meetirye. Ez merdimê doze ya û seba Kurd û Kurdîstanî şer kena. Dayîka min do bi hezaran merdimî mergê ma ra dime hişyar bibî û beyraqa ma do bileqo. Wa gêsanê mi ra beyraqe virazî.”
Leyla Qasime îdambîyayîşê xo ra ver vana ‘şima eşkenî mi bikişî, labelê mi ra dime do bi hezaran kurdî biwerzî payan ser’. Leyla 12ê Gulana 1974î de yena îdamkerdene. Rejîmê Baasî seba ke birayê Leyla Qasime Selamîyî fotografê waya xo pare kerdo, Selamî zî qetil keno. Leyla Qasime û xoverdayîşê aye sere de hetê Cegerxwîn, Hêmin û sewbîna bi desan şaîr û hunermendan ra bena babete edebîyatî.
SILÊMANÎ /ROJNEWS