Bextwaştoxê sûrîyeyijî nêy 10 rojî ra vîşêro ke Otogarê Stenbolî û Edîrneye de yenî vindarnayîş. Bextwaştoxî rayna tepa açaryayî cayo ke amey ra, labelê wexto ke bextwaştoxî hîna tîya de bî, çîyo ke bextwaştoxan dîy tena vêşanî nêbî. Hetê vêşanîye de teda û zilm zî vînay. Babete sero pawitoxa heqê merdimantî Leman Yurtsever, bade ke bextwaştoxan reyde pêvînayîş kerdbî, mîyanêya qalîkerdişê xo ard ziwan.
Rayedarî teda kerdî
Yurtsever dergeyîya qalîkerdişê xo de bal ant ser tedaya ke ser bextwaştoxan ame kerdiş û wina verdewam kerd: “Wexto ke ma semedê ke şêrî Edîrneye otobus wenîştî, muawênê otobusî semedê ke mîyanê otobusî de sûrîyeyijî estî an ney, kontrolkerdişê kamîyan kerd. Wexto ke ma sebebê kontrolkerdişî persay, ma ra vat ke hetê rayedarê dewletî ra girewtişê sûrîyeyijan a otobusan ameyo qedexekerdiş. Ger ke mîyanê otobusî de sûrîyeyijî bibî, aye wext otobus hetê rayedaran ra yeno bestiş. Hêzê asayîşî tîya de vecyay seydê sûrîyeyijan.”
Bi zorî înan kenî ajan
Leman qalîkerdişê xo de ciresna ke wexto ke keyeyî kelekan (bote) wenîşinî, înan rê îlacek yeno dayîş û no îlac zî hewnê înan ano. Sebebê dayîşê no îlacî zî wexto ke kelek biqelibyo û bikewo binê awe, wa yew nêqîro. No semedî ra hende hedîseyê xeniqîyayîşî benî. Tayîn bi bermayîş, tayîn zî bi hêrsbîyaye hîsê xo ardî ziwan. Rayna tay ciwanî hetê polîsan ra kuwuyay û semedê ke bibî ajan, teda ser înan de ameyo kerdiş. Wexto ke ma şîyî Raşteyê Erî, her çende ke raşte herabi rayna zî bextwaştoxî teberî de mendbî.”