Jû helbestvanê niya nusnena: Şewan kisenê/Şewdiran biseveknê.

Seweta ma zî niya ro. Dewleta terorîste wazena na raye zî rastke sodiranê ma bikiso. Sewê ma hora kistê. Hata na roze ma qirkerdîme, tertele kerdîme.
Nika wazenê bi vatîsanê haştiye û muzakere onca kokê ma biyarê. Yanî mestê ma, sodirê ma bikisê.
Ma mejburîme xo na dewleta terorîste ra biseveknîme!
Dîktatorî xora qederî hukmê kesî qebul nêkenê. Wazene ke her çî bi vatena înan bo. Dewleta terorîste zî tam niya fikrîna.
Haştiye vana, hama wayîranê mesela de nêwazena qesey bikero. Vana ‘kam ma de qesey keno, ma qerar dame”.
Serokwezîrê na dewlete Recep Tayyîp Erdogan nêwazeno hemserokê BDP û KCD şerê Îmralî. Gorê Erdogan, Gultan Kişanak û Aysel Tugluk virare fîşta gerîllayan ra, coka nêşîkînê şerê Îmrali.
Ahmet Turk vato “ti hem kurdan bomba kena, hem haştiye ra qesey kena, no sene hal o”. Na semed ra Ahmet Turk zî nêşîkîno şero. Pekî Ahmet Turk se bivatenê? Ahmet Turk hen vat, çike teyaranê na dewleta terorîste başurê Kurdîstanî bomba kerd bî û 7 gerîllayê kurdî qetil kerd bî. Dewleta terorîste hona yeno peyen başurê Kurdistan de bombeyî vornayî heremanê gerîlla ser. De, bêre ke dewleta terorîste rê îman bikerê!
Mend Selahattîn Demîrtaş. O zî hora mesajanê sertan dano, qeyta nêbeno.
Kamî de sene haştiye virazeno, ya zî wazeno, nika tam biyo zelal. Hurd hetanê masa de bi xo nîseno ro. Ebi xo bipozo bi xo boro, dîktator.
Her roz hebena beno zelal ke, dewleta terorîste raştiye de kurdan de haştiye nêwazena. Eke niya nêbo, masa de kam nîseno ro, bi maê kurdan kam qesey keno, naye ser rêxistine kurdan bi xo qerar danê, Anqara qerar nêdana.
Hukumat û dewleta tirkî xorê xizmetkaran wazenê, partneran nêwazenê. Dewleta tirkî nika tenge dera. Caye ra jûyî payna dimê na dewlete do, dez oncena. Qeseykerdene rê mecbur menda. Naye ra avê şîkîyenê pê kurdan bixapno, la nika endî nêşîkîna, çike kurdî amê xoser û pê vatîsanê dewleta terorîste qan nêbenê.
Na haştiya nînan rê mordem şîkîno na lawike vazo:
“Dowo dowo bibe
Rono rono cibe
Olî eskera be mangu bide
Olî eskera be malî dide
Tew lo tew lo tew lo tew lo”
Na lawika xo vazê, dewleta terorîste ra haştiye mepiyê!
Ya zî cirê jû verniyazê mi esto:
Mehmet Metîner bi Orhan Mîroglu ra bijero verva xo ronîsno, o qesey bikero, î zî vazê heya, hen yo başbaqanim!