Ewro Serrgêra 3. ya Fermanê Êzidîyan o. Koordînasyonê Koma Cinîyanê Kurdistanî (KJK) babete ser o îzehetêko nuştekî weşêna.
Koordînasyonê KJKyî îzehetê xo de va ‘hîna dejê êzidîyan peynî nêbîbî û doman û cinîyî destê çeteyanê DAIŞî de bîy, AKP û PDKyî 3ê Adare de reyna hêriş kerdî’ û îzehet wina dewam kerd: “Nê hêzê çeteyan hîna zî warê Xanesorî de seba şarê ma yê êzidî tehdît û tehluke yî. Ma nê hêz û hêrişanê DAIŞî bi hawayo nefret şermizar kenî.”
Ganî xo îdare bikero
KJKyî dewamê îzehetê xo de wina va: “Problemê Şengalî tena problemê şarê êzidî nîyo, heme Kurdistan û Rojhelato Mîyanênî eleqeder keno. Rizgarîya Şengalî ancax bi îdareyêko xoser mumkin o. No zî ancax êzidîyî Rojhelato Mîyanên û Kurdistan de biresî heqanê xo beno. Çareserîya tewr raşt na ya. Qetlîyam keweno serra xo ya 3. û PDKyo ke seba statuyê Şengalî qet hewl nêdano, hêzê HPG û YJA Starî keno mehne û problemê Şengalî sey problemê PDK û PKKyî nîşan dano. Bi no hawa bîyo sebebê şehadetanê neweyan. Teyarayê dewleta tirkî Şengal ser de bombe varnayî, labelê PDKyî vera nêyî de ti reaksîyon nênawit û dewleta tirkî reyde peymananê xo domna.”
Ma do destûr nêdî
KJKyî îzehetê xo de va ‘Sey ke şarê ma yê êzidî vano Şengal rizgar bî, labelê hema azad nêbîyo’ û wina dewam kerd: “Şarê Şengalî hêzê xo yê pawitişê cewherî awan kerdî û ganî her kes nêyî rê rêz bigîro û na îrade bişinasno. Nê semedî ra seba şinasnayîşê YBŞ, YJŞ û Tevgerê Azadîya Cinîyê Êzidî têkoşîn bêro dayîş. PDK herinda ke wina bikero, estena nê hêzan sey problemî vîneno û no fîyasko yo û Şengal qetlîyamî reyde têrî verdayîş o. Ma Roja Şînî ya Neteweyî ya 3ê Tebaxe de şehîdanê xo yad kenî. Ganî PDK hêzê xo yê ke Tirkîya de perwerde kerdbî û nika Xanesor de bica kerdî, tepîya bianco. Ganî qerarê îradeya sîyasî yê şarê Şengalî bêrî naskerdiş. Hêvîya heme cinîyê kurd û şarî na ya.”
Ganî her kes piştî bido
KJKyî peynîya îzehetê xo de wina va: “Ma veng danî heme cinî û kurdistanijan ke wa wayîrê Şengalî bivejyî û qetilkaran ra hesab bipersî. Ganî her kes bibo vengê cinîyanê êzidîyan. Wayîrvejîyayîşê Şengalî, wayîrvejîyayîşê cinîtîya ma, nasname û azadîya bawerî yo. Na çarçewa de ma Roja Şînî ya Neteweyî ya 3ê Tebaxe de heme şehîdanê xo biminet yad kenî û vernîya vîrardişanê înan de bihurmet milê xo çewt kenî. Ma do nê qetlîyamî qet xo vîr ra nêkerî. Heta ke Şengal azad bibo û statuyê ci bêro şinasnayîş ma do wayîrê Şengalî bivejyî. Şarê ma yê êzidî zî do bi hawayo taybet hêzê xo yê pawitişî gird bikero. Wa bêro zanayîş ke Şengal tena nîyo, do tena zî nêmaneno.”
ANF/BEHDÎNAN