Ez şaş bîya. Dîrê reyî min ci ra pers kerd. Kokimî qet xo şaş nêkerd. Bi zanayîşî qisey kerde. Winî aseno kokimê mi hewna gedeyîya xo de nê qisayan goşdarit o. Coka qet xo şaş nêkeno û waharê heşê de pêt o. Kokimê mi, Xelefê Silêmanê Xaltîye, hatê mêjûyî ra çîyê nêzano. Çi çî kamcîn serrî de bîyo nêzano. Xora kurdî rê nayê girîng zî nîya. Raştîye fekan ra gêreno coka zî qet nêmiren o. Vîrî ra nêşino. Ê ded Xelefî zî wina yo.
Dedo porê xo yê derg munit o. Di hetan ra di gilî sêneyî ser ra verda yo. Zaf bala min ant. Labelê eke ez ci ra biewnî do bertekê senî bimojno min ez nêzana. Bi tersî ya min vat: “Dedo ez şîkîna gilîyanê to ra biewnî”. Ey vat: “A-a naye çîyêde nimite nîya aşkera ya”. Dedo vala serê xo ra hewa na. Mi bi telefonê xo ya wêneyê ey ant. Min pers kerd û vat: “Çira to por kerdo gila”. Ey zî cewab da: “Xatirê Şerfedînî min por gila kerdo. Gilakerdişê porî Şerfedînî ma rê ferz kerdo”. Şerefdîn rizgarkerê êzidîyan o. Dedo vano: “Rojê do Şerefdîn bêro şarê êzidî bixelesno.” Min vat: “Çire gilî apey ra vera nêdanê?”. Ey zî vate: “Nêbeno, camêrdî ganî gilî verdê vernî ro”. Dedo vano: “Gencê nika simbêlî taşenê. Rê û resim (gelenek) nêmendo, gencî bawerîya xo ra dûrî kewen ê.”
Dedoyî reyde galegalê min dewam kerd. Dedo keye û eşîrete Barzanî rê vano kurd. Kurdî rê zî vanê kirmanc. Îxaneta Barzanîyan sey îxaneta kurdan name kenê. Mabênê qiseyan de ge-ge persa Rayver Apo keno. Vano: “Hal û hewal, şert û şûrtê ey senîn ê?” Dedo qala îslamîyet û bisilmanan zî keno. Îslamîyetî rast vîneno la bisilmanan duştê îslamîyetê vînen o. Dedo vano; cenîyê bisilmanan ma rê heram ê. Yê ma zî înan rê heram ê. Labelê seba bisilman nêzanê, cenîyê ma gênê xo rê mare kenê û vanê “Nufusa ma bisilmanan vêşî bî.” Naye zaf zor dayo dedo. Pê zaf qahirîyeno. Mezgê dedo de DAIŞ û bisilman yew çî yo.
Dedo Xelef wexta qala çîyê xirab biko, fekê ey ra çekuya ke xirabîye name kena nêano ziwanî ser. Vano: “O çî, ez name nêkena la ti fam bike ke ez se vana.” Fînak; nêvano tecawizkerdişê cenîyan, vano; o çî ti fam bike. Zîhnîyeta dedo de nêrindî çinî ya. Eke nêrindî estbo zî ganî merdim name meko. Heme taybetmendîye yê komela komûnal, dedo ser de serwer ê. Afernayîşa çîn, (sınıf) desthilatî û dewletî ra ver, mezgê merdimîye de talan û qirkerdiş çinî yo. Ganî veşnayîş û koçberkerdiş çinî bo. Cuyayîş pîya û sey yewbînî bo. Dedo Xelef zî waharê nê taybetmendîyan o. Qandê coy no dinya zalim de çîyê benê, qet weş bi ey nêşinê. Coka bêçareyî û perîşanî ciwîyen o. Dedo peynîya qiseyanê xo de vano: “Do Şerfedîn bêro ma bixelesno”.
AZAD ARARAT