Qezaya Sînûne ya Şengalî de seba şermezarkerdişê dagîrkerîya dewleta Tirkî û hemparîya hêzanê Kurdan, rayraşîyayîşêk ame viraştene. Rayraşîyayîş hetê Yewîya Ciwanan a Êzidîyan (YCÊ) û Têgêrayîşê Cinîyan ê Êzidîyan ra ame organîzkerdene.
Bi tewrbîyayîşê hemwelatijanê Şengalî rayraşîyayîş vernîya Meclîsê Şarî yê Sînûne de dest pêkerd û heta cadeyê Mîfrîqî yê dewa Kersê dewam kerd. Rayraşîyayîş de pankartê girdî yê bi nuşteyê ‘Vera dagîrkerîya dewleta Tirkî û xîyanetî sere wedarnê’ ame akerdene. Çalakgêran siloganê ‘Bimiro xîyanet, biciwîyo xoverdayîş’ eştî. Çalakîye de eşkerayîyêk ameye dayene û eşkerayîye hetê Şigab Reşoyî ra ameye wendene.
Eşkerayî de wina ame vatene: “Dewleta Tirkî ya dagîrkere dişmenê şaran a û seba xeyalê Osmanîye cehd kena ke temamê erdê Rojhelatê Mîyanênî dagîr bikera. Dewleta Tirkî nika ra hewl dana Başûr û Îraqî dagîr bikera. Dewleta Tirkî bi na dagîrkerîye her roje sînorê ke bi qanûnanê mîyanneteweyîyan ameyê dîyarkerdene, îxlal kena. Dewleta Tirkî, hemkarîya PDK û keyeyê Barzanî reyde Başûrî dagîr kena. Nika dewleta Tirkî wareyê îstîxbaratî ra bigêrê heta eskerîye, ekonomî û perwerdeyî mudaxeleyê Başûrê Kurdistanî kena. Îşxalkarîye reste merheleya winayêne ke konsolosê Tirkan Hakan Karaçay sey Serekê Herêma Kurdistanî têgêreno.”
Wa bi ruhê Şeladizê sere wedarnî
Dewamê eşkerayî de ame vatene ke xeylî qerargeh û qereqolê Tirkî bi hemkarîya barzanijan mîyanê erdê Başûrê Kurdistanî de ameyî bicakerdene û wina domîyayo: “Dewleta Tirkî bi teyareyanê şerî Başûr de komkiştiş kena û mal û baxanê hemwelatijan talan kena. Nika zî dewleta Tirkî bi hemkarîya barzanijan hêrişê Herêmê Pawitişî yê Medya û Xakurkê kena. Labelê her roje derbanê giranan gerîlayanê qehremanan ra wena. Ma xoverdayîşê gerîlayan ê Xakurkê silam kenê. Ma veng danî ciwanan ke wa bi ruhê Şeladizê sere wedarnî.”
ROJNEWS / ŞENGAL