Dewleta Tirkîya rayna vera kurdan yew konseptê şerê dayo dest pêkerdiş. Rayna ceng gir bîyo, her roj, ciwanê kurdan û tirkan heyatê xo vînî kenê. Ma ewta de şîynê vajê ke, netewê înan çi beno wa bibo, keyfê ma, mergê nê ciwanan nîyno. Qerarê nê cengê de, ingişta nê ciwanan çin a.
Xora nê leşker û polîsî ke no ceng de, heyatê xo vînî kenê, gedeyê xizanan ê. Dewleta Tirkîya, hima-hima her roj bi desan teyaranê şerî, heremê Medya (Qendîlî, Xinare, Metîna, Haftanîn, Gare, Zap, Zagros, Xakûrke, Gabarî) rê bombayan varnenê.
Bi nê bombayan sîvîlan qetl kenê, daristanan veşnenê. Dewa Qendîlî Zergelê de yew cinîya hemla tede heşt tenî, bi bombayanê cengê qetl kerdê û pancês tenî zî bîrîndar kerdê.
No qetlîamê sîvîlan medya de neşr bîyo. Kam ke vajo ez merdim a, mutlaq vera manzaraya qetlîamî xemgîn beno. Teyareyê şerî goristanan bombardiman kenê, daristanan veşnenê.
Eynê bombardimanî, vakur de zî benê, vakur de zî operasyonî dewam benê û ciwanî cuyê xo vînî kenê. Vakûr de zî daristanî yene veşnayîş.
Resmen paştî dana DAIŞî
Yewna het ra nê hewteyê vêşêr o ke no germê hamnanî de, yew alman tede cenazeyê 13 şerwananê YPG, berê Habûrî de edilnenê. No çi tewir yew kîn o ke, yew het ra cenazeyan ra întîqam gênê, yewna het ra goristanan bombardiman kenê? Berpirsîyarê Tirkîya goya vanê ke; “Ma vera DAIŞî şer kenê.” Nê ciwanan vera, DAIŞî şer kerdo û no şer de ganê xo feda kerdo. Ma raşt vajê; Dewleta Tirkîya, bi no têgeyrê xo, resmen paştî dana DAIŞî. Aseno ke vera kurdan, yew kînê înan yo zaf pîl esto. Vanê ke; “Ma û kurdî birayê yewnan (yewbînan) î.” Na çi tewir yew birayey a?
No yew hewteyê vêşêr o ke koyê Vaşûrî bombardiman benê. Hemwelatîyê Barzanî qetl benê. La Mesût Barzanî û KDP vera nê qetlîaman bêveng manenê. Hetta vatiş û têgeyrê xo de, destek û cesaret danê dewleta Tirkîya. Eke mîyanê kurdan de, yew tifaqe bibîynî, Dewleta Tirkîya nişnaynî inahewa yew bombardiman biko. Mesûd Barzanî ganî vera nê bombardiman û qetlîamî de bêveng nêmano. Eke HPG, YPG, YJA Star û YPJ ra nêbîynî DAIŞî nêverdaynî ke Mesûd Barzanî saraya xo de, ina hewa rehet roşo.
Dewletê Ewrupa menfeetê xo esas gênê
Semedo ke Rojawan de, YPG/YPJ û Bûrkan El Firat zorê DAIŞî benê û welatê xo de zî pergalê xo awan kenê, hesabê Dewleta Tirkîya nîyno. Na heme kes zano ke, eke YPG/YPG û Bûrkan El firat, HPG û YJA Star ra nêbîynê; DAIŞî bi temam Iraq û Sûrîye îşgal kerdnî. Kam sevano va vajo, netîceya nê şerî DAIŞî rê, wayîranê Fabrîqayanê çekan rê û dîktoranê Rojhilatê Mîyanênî rê fayde ana. No ceng de, ciwanê xizananê kurdan, tirkan ereban û şaranê binan cuyê xo vînî kenê. Ma na hinê baş fam kerda ke; Amerîka tede heme dewletê Ewrupa menfeetê xo esas gênê. Dewletê Ewrupa û Dewleta Amerîka YPG reyra vera DAIŞî şer kenê. La bakûr de û Vaşûr de vera nê bombardiman û qetlâmî de zaf vengê xo nêvejenê. Çunku çekanê xo roşenê Tirkîya. Çunku Dewleta Tirkîya reyde dayîş-girewtiş kenê.
Ergenekon, JÎTEM, TÎT û Tîmê Xencerî
Serranê 1990’yan ra pey wextê hukmatê Tansû Çîller de, welatê kurdan de, rêxistinî tarîyê ke nameyê înan; Ergenekon, JÎTEM, TÎT û Tîmê Xencerî bî, organîze bîybê. Nê rêxistinanê tarîyan, welatê kurdan de, epey qetlîamî kerdê, dewî û daristanî veşnayê, bi des hezaran merdimî keyan û kuçan ra bi zor remnayê, bi tewir-tewir îşkenceyan kiştê û vînî kerdê. Goristanê komkişteyanê Wextê Tansû Çîllerî, hima zî nêabîyê. Hima zî hedîseyê nê demî, eşkera nêbîyê. Aseno ke Hukmatê AKP zî nê qetlîamanê Tansû Çiller ra ders nêgirewto, bi heme hêzê xo dest bi şerî kerdo. Hukmatê Tirkîya, hetan eyro pey prosesê çareserî, ma kurdî xapînayî. Peynî de vat ke; “Meseleya kurdan çin a, teraf çin o, muzakere çin o, tabloyê Saraya Dolmabexçeyê weş nêbi” Tewr peynî de zî vat ke; “Prosesê çareserî herimîyayo.” Zaf şîroveyan de vajîno ke; “Semedo ke Weçînayîşê Hewtê Hezîrane dima Recep Tayîp Erdogan, Serekê Dewlete nêbîyo, Prosesê Çareserî herimnayo û Tirkîya verbê cengî beno. Yewna het ra wazenê ke yew qaos vejê û newe ra Tirkîya berê weçînayîş û HDP bendê weçînayîşî de verdê.” Aseno ke eke HDP binê bindê weçînayîşî de bimendnî û Recep Tayîp Erdogan bibîynî serekê dewlete, no şer nêvejîyaynî.
MAMOSTE SILÊMAN
Ez bi xo, no vatişê Serekwezîrî samîmî nêveynena
Serekwezîr Ahmet Dawûtoglû vano ke; “Seba nê welatê, seba na milete, ma ewladanê xo zî, xo zî fedakerdiş rê hedreyî.” Ez bi xo, no vatişê Serekwezîrî samîmî nêveynena. Ay wext wa maya gedeyê xo ra biberso, gelo maya gedeyê ey, lajê xo fedakerdiş rê hedre ya? Mesela lajê Serekwezîr Recep Tayîp Erdoganî ay pîlî leşkeri nêkerda, gedeyê ey şinikî zî bi bedelî 21 yew rojî leşkeri kerda. Lajê Abdûllah Gulî 32 serre yo hima zî leşkeri nêkerda.
Serekwezîr, wezîr û wekîlê AKP ceng ra zaf hes kenê, la laj û nîzdîyê wezîran û wekîlanê AKP, pey peran leşkeri kenê. Nê nameyê medyaya sosyalî de ameyê neşrkerdiş. Mesela Wezîrê Karê Awe Weysel Eroglû vano ke; “Ma Qendîlî rijnenê, ma firkerdişê şerbetê şahadetî rê hedreyî.” No vatiş zî ma rê zaf samîmî nîyno. Çunku lajê ey zî pereyê xo dayî, yew roj zî leşkeri nêkerda. Gelo şima pey lajanê kamî Qendîlî rijnenê? Tansû Çîller zî şer ra zaf hes kerdnî. Bi des hezaran ciwanê kurdan û tirkan wextê Tansû Çîller de cuyê xo vînî kerdbi. Ay wext lajê Tansû Çîllerî Mert Çîllerî, Boxazê Stenbolî de leşkerîya xo kerdnî. Merdimo ke şer nêwazo, lajê xo raynêko leşker, no yew çîydo zaf normal o.
Ma bi xo ne şer wazenê ne zî ma wazenê ke yewer şer de bimiro. La wexto ke merdimo ke şer ra hes biko, lajanê xizanan rayko şer û bi lajanê xizanan camêrdey biko, na yew bêexlaqey a. Eke Hukmatê AKP û Serekkomar Erdogan, na politikaya xo ya şerî dewam bikê; ê zî eqîbeta Tansû Çîller ra nêxelisînê. Tansû Çîller zî vatnê: “Ya qedînê, ya qedînê.” Peynî de kam qedîya bellî yo.