Şêra Kurdistanî: Leyla Qasim

Leyla Qasim serra 1952 Xaneqîn, Kurdistanê Başûrî, de ameye dinya. Qasim panc domanan ra aya hîrêyine bîye. Melumatan ra gore aye domanîya xo feqirîye de vîyarte, badê ke Kerkûk de perwerdeyê xo dî, keyeyê xo ra bar kerd şî Bexdad. 16 serrîya xo de rejîmê Baasî Îraq de hukmat ser ame. Leyla Qasim kî bîya endama PDK-Î. Qasim zanîngeh de piştgirîya “Yekitîya Qotabiyên Kurdistanê” (Yewîya Wendekaranê Kurdistanî) kerde. A rayvistiş de Leyla Qasim mêrdeyê xo yê ameyoxî Cewed Hemewendî nas kerd. Înan pîya duştê rejîmê Baasî û derheqê rewşa kurdan de nuşte û meqaleyî nuştêne. O çax de Leyla Qasim qerar da ke a bikewo pêşmergeyan.

1974 de artêşa Îraqî duştê kurdan de dest bi herbêde giran kerd. Şaristanê Kurdistanî ke amey bomba kerdene, keyeyê kurdî kî Bexdad ra amey vetene. No semed ra Leyla Qasim û çar hevalê aye yê şoreşgerî duştê nê herbê qilêrinî de qerar da ci ke yew teyaraya artêşa Îraqî biremnê. Labelê no plan serkewte nêbî û Qasim û hevalê xo 28. nîsane de amey pêgirewtene. 12 gulan 1974 de Leyla Qasim û çar şoreşgerê kurdî hetê rejîmê Baasî ra Bexdad de amey darde kerdene.

Vanê ke Leyla Qasim dardekerdiş ra ver sereberze bîye û vat: “Mi bikişê, la na raştîye kî bizanê ke bi kiştişê min bi hezaran kurdî do hewno giran ra hişyar bibê. Ez zaf keyfweş a ke bi serfirazî û raya azadîya Kurdistanî de canê xo feda kena.” Kehanetê Qasim kî rast vejîya: dardekeridişê aye ra tepîya xeylê wendekarê Kurdistanê Vaşûrî kewtî lejê mesela kurde, zafê înan kî vejîyay koyan ke seba azadîya Kurdistanî pêro bidê. 

 AMED