Operasyono ke çormeyê dewa Dêrxustê yê Licê de ame dest pêkerdiş rameno. Bombardumanê helîkopteran ra pîya, daristanî amey veşnayîş. Çormeyê dewa Xosor de zî vera quwetê ke vejyay operasyon çalakîya bombeyîn virazîya. Netîceyê çalakî de serdarêk û 2 leşkerî amey kiştiş.
Qezaya Amed Licê de bado ke herêma Dêrxustê şewa verî saet 18.00 ra tepya amê bombarduman kerdiş, vizêr saetanê sodir de zî çortalê dewanê Xosor û Dewaxey de bi tewrbîyayîşê xeylê helîkopteran û wesayîtanê zirxî operasyonê hewayî û erdî ame dest pêkerdiş û operasyon vilayê mintiqayê hera bi. Leşkerê ke tewrê operasyonî bî cayê daristanî day ver adir.
Helîkopteran leşkerê dirbetin kirêştî nêweşxaneyan
Goreyê zanayîşê ke dewijan day, operasyono ke vizêr saetanê sodir de dest pêkerd vila beno. Verîya nika zî na herem de xeylê reyî operasyon ame dest pêkerdiş û xeylê dehl û rezê welatijan amey veşnayîş.
Dewoka Dewaxey de vizêr wexto ke helîkopteran leşkerî ronay û leşker kewtî gelî teqîyayîşeke qewimya. Goreyê zanayîşan netîceyê teqîyayîşî de yew serdarek ra pîya 2 leşkerî amey kiştiş.Herzewbîn xeylê leşkerî zî bî dirbetin. Helîkopteran bê mabên leşkerê dirbetin hewaday nêweşxane.
Teqîyayîşî ra dima leşkerê ke vejyaybî operasyon peyser ancîyay û ser tepeyanê berzî de amey bica kerdiş. Herêm de hereketîya leşkerî ramena.
AMED