Nê rojan  de herkes ser çîyek qise keno. No çîyê, şerê beyntarê Cemaatê Fetullahî û AKP yo .

Ne vanî ehleq, ne vanî vîjdan.
Fekê xo akenî, fekê înan ra zewt varanê.
Fekê xo akenî, fekê înan ra  nelêtullah varanê.
Fekê xo akenî, fekê înan ra zîlletullah varanê.
Fekê xo akenî, fekê înan ra bêxeyrullah varanê.
Fekê xo akenî, fekê înan ra dişmenullah varanê.
Fetullahî û AKP’yî hemver yewbîn hina qisekenî. La ma zanî seba pere, îktîdar û kursî pîya hereket kerdenê.
Hemverê Kirdan, pîya operasyon viraştenê.
Qirkerdişê Kirdan, pîya kerdenê.
Her dideyan pîya ra, ser sîyasetmedarê Kurd operasyon viraşt û des hezar sîyasetmedarê Kurd tepêşt û eştî xepisxanê.
Hem AKP’yî û hem zî Fetullahî, wextê hukumatê AKP de bîyê zengîn. Bîyê wayîrê kidik. Bîyê wayîrê tillik. Bîyê zê silvêre.
Pêronê dezgehan beyntarê yewbîn da bar kerdibî.
Nika AKPyîj û Fetullahîyîj pîya,  zerrê qesran de sarayan de ciwîyenê.
Her dideyan vatenê ma dînê Îslam pawenî.  Kurdê welatparêz zananê zuran kenî. La nika vejîya werti ke,ti eleqê Fetulahîyan û AKP’yîyan û dînê Îslam ra çîno.
Dînê Îslam seba pere û îktîdarê xo danê şixulnayîş.
Vejîya werti ke, çîyo ke kenî, gorê dînê Îslam munafiqiyo.
Vejîya werti ke, çîyo ke kenî, gorê dînê Îslam fîtnekariya.
Vejîya werti ke, çîyo ke kenî, gorê dînê Îslam fesadîya.  
Eynî raştî, Çewlîg de zî vejîya werti.   
Pêro Rêberiya AKP yê Çewlîg îstîfa kerd. Gorê ke, asena pêronê înan Fetullahîyê. Şaredar Serdar Atalay zî zê bizotê bîyo. Fekê eyê ra adir varano. Semede ke AKP, Serdar Atalay reyna seba şaredarî nîşan nîdo, hêrs bîyo. Ser AKP qise keno.
Nayê pêro emelê AKP û Fetullahiyan ra bîyo eşkere ke, eleqê her dideyan însanîyet û dînê Îslam ra zî nêmendo. Mexsedê înan ciya yo. Mexsedê înan pere yo. Mexsedê înan menfaat o. Mexsedê înan werdiş o. Mexsedê înan vêre gird kerdiş o.
Hina asena ke, hem AKPyîj hem zî Fetullahîyîj seba menfaat, pere û kursî pêronê erjayîyo, rumetiyo erzenî binê lingan û roşenî.
Seba  zê AKP’yîyan û Fetullahiyan verênan ma hina vato.
“Beynatayê raşt û zurî yew vencew a”.
Wa şarê ma dirîyî, munafiqî, fesadî û fîtnekariyê AKP û Fetullahîyan weş bivîno û wecînayîşê şaredarî de dersek weş bido înan.