10 hezar Kurdî tepiştî û eştî zîndanê xo. Sîyasetmedar, doktor, awuqat, rojnameger, sosyolog, qij û pîl, dayî û baw, kêna û laj cîya nîkerd. Pêronê înan he çar û panc serrî zerrê zîndanê de girewt û verdê. Zîndanê Pozantî û Sincan înan de tecawizê tutê ma kerd. Zîndanê de zaf însanê me şehît kewtî. Xo ra dewşîrmeyo zê Mehdî Ekerê AKP’yî vatibi, “Verêcu Kurd eştenê çalê asîtê kiştenê, nika zî ma erzenê zîndanê. Wa Kurd şûkir bikerenê”.
Ma nayê verênê. AKP û Fetullahîyan pîya hemberê Şarê Kurd bin name KCK operasyon ramit. Rojnamê û TV înan zî hem verêneyê operasyon de hem zî demê operasyonê de manşetê baldar eştênê. Ser qikerdişê Roboskî zî hina manşet eştîbî.
Çend mîsalê hinabî.
Rojname Zaman: Operasyon seba DTP nîyo, seba PKK’yo(Operasyon DTP’ye değil PKK’ya).
Rojname Bugûn: KCK’ra seba çapameni 38 Mîlyon Euro(KCK’dan basına 38 milyon euro)
Manşetê Rojname Taraf seba komkiştişê Roboskî: Bahoz pê cilê qaçaxçî yeno(Bahoz kaçakçı kılığında gelecek)
Manşetê Rojname Zaman seba komkiştişê Roboskî: F-16’yan sînorê Iraq’î de da qaçaxîyan ra: 35 merdî. (Irak sınırında F-16’lar kaçakçıları vurdu: 35 ölü)
Tena yew bi ewnê nayê manşetan beso. AKP û Fetullahîyan seyî dişmenê Şarê Kurdî! Seyî Şarê Kurd kiştenê, ser ra zî pêronê qirkerdişê xo nimitenê! Şarê Kurd sucdar nîşandenê! Mezgê înan zincaro yane jehro, vîjdanê înan zincaro, ehleqê înan pûyayîyo, zerrê înan pêro zincaro.
Wexto ke pê nayê manşetan Kurd amenê kiştiş û tepiştiş, Medyayê Tirk hetê Şarê Kurd û rojnamegerên Kurd nêgirewtenê. Kesêk nîvatenê rojnamegerên Kurd bilaheq ameyê tepiştiş. Rojnameger û medyayê Tirk nîvatenê nayê hevalê yê karê mayê, gera ma bi vîjdanê bi. Medyaya alternatîf û azad yê Kurd têna serrê 1990’an de 76 şehît dayê. Ma nêşîyerê dûrî, çend roj verêcu zerrê Edenê de Rojnamegerê Kurd Qadrî Bagdu ame şehîtkerdiş. Reyna medyaya Tirk bî ker û lal.
La nika AKP hemberê medyayê Fetullahîyan operasyon da destpêkerdiş, medyaya Tirk vana no neheqîyo. Medyaya Fetullahî zî şerm nêkenê xo ra vanî “medyaya azad” û dima ra vanî, “AKP ser ma darbe kena û raminena”. Eleqê Fetullahîyan û azadî qet û qet çîn o. AKP seyî dişmenê azadî û demokrasîya û azadîyê fikrîya, Fetullahî zî hina dişmenê azadî û demokrasî û azadîyê fikrîyê.
Çunke her di hêz zî Tirk Îslamcîyê. Ma kilmek û Kirdkî vanî her di zî faşoyê. He di zî dişmenê Şarê Kurdê. Her di zî îstîlaker û zûrreker û qetilkerê Kurd û Kurdistanê yê. Her di zî wazenê Kurd û Kurdistan werti ra rakerenê. Her di zî wazenê Kurdan bikerenê kolê xo. Her di zî Ergenekonê kewe yê. Verênanê ma seba ayê hina yew qalek weş û rindek vato.
Vato ke, “Kutik kutiko, ha sûr ha sîya”. Wexto ke di kutik benî yan zî di vergî benî, yewbîn ra şer bikerenê, ma yew het zî nêgenê. Gureyê ma ayo ke, her di zî seyî dişmenê Şarê Kurdê, emelê înan şarê xo ra nîşan bidî.