Qetlîama Cizîr şarê Kurd ra piya çormeyanê azadîwaşt werzna ser payan. Bado ke xebera qetlîam aşkere bî, Kurdistan û Tirkiye ra piya çar leteyê dinya de des hezaran kes vejiyay meydanan û dewleta Tirk lanet kerd.
Amed de vizêr cuwyayiş serva Cizîr vindiya. Amedijê ke vizêr vejiyay kuçeyan, veng day xoverdayişê Cizîr. Dewleta zilimkar êrişê nûmayişkaran kerd û gencê bi nameyê Mahmût Bûlak qetil kerd.
‘PKK şar o’…
Amed de, bi hezaran kesê ke ser vengdayişê HDP, DBP Parqa Koşûyolu de are bî bi slogana ‘PKK şar o, şar tiya de yo’ destpa rayşiyîn kerdî. Polîsan bi gaza îsot êrişê nûmayişkaran kerd. Welatijê ke vilayê kuçeyan bî destpa nûmayişê vengvetiş kerdî û pozîsyonê xopawiten girotî. Bi desan wesayîtê zirxî û Ford Ranger’ê kuçeyan de geyriyay. Mavêna nûmayişkaran û polîsan de pirodayişî vilayê pêrokîn kuçeyanê sûk bî. Nûmayişkaran ra genco 16 serre, bi nameyê Mahmût Bûlak ke sereyê xo ra derbe werd hewadiya nêweşxane, la weşiya xo kerd vinî.
Vera zilmî xoverdayiş
Nûmayişa protesto yê Dersim zey her tim kuçeyê Sanat de viraziya. Nûmayişa ke temsîlkarê xeylê rêxistin û sazgehan tewr bî de, panqarta ‘Vera zilm wayrê xoverdayiş bivej” abiya û sloganê zey “Bi xoverdayiş ma dê serkewê”, “Şehît nêmirenê” berz bî. Bado ke şêlig resiya ver bana DBP, hemserokê sûk yê DBP Soner Oz qisey kerd û hayr ant muhîmiya berzkerdişê xoverdayenê Amed û Botan ser.
Vengê ‘Bodrimê Cizîr’
Soner Oz aşkere kerd ke, şarê Cizîr û Sûr, vera tanq û topanê dewlet çokê xo nêda ro û vist vîrî ke, tewr peynî de qûwetanê dewlet vera xoverdayişî bodrim de bi desan kes înfaz kerd. Oz’î vist vîrî ke, tenya jew çareyê dewlet esto, o zî qebûlkerdişê waştenanê Kurdan o û niya va: “Ganî maneya vengo ke ‘Bodrimê Cizîr’ ra ame rind bîro fehmkerdiş. Kurdistan, Tirkiye û pêrokîn dinya de berzkerdişê xoverdayiş deynê ma yo.
Parlamenterê HDP yê Dersim Alîcan Onlu zî hayr ant qetlîamanê verîn yê Dersim ser û aşkere kerd ke, gune hereketê çep, sosyalîst û emegî vera qetlîaman bêvengiya xo xirab bikerê û paşt bidê xoverdayişî. Nûmayiş bi slogananê “Bicuw xoverdayişê Sûr û Cizîr” qediya. Colemerg de zî wehşeta Cizîr bi damûstayina çapemenî protesto bî. Înisiyatîfê Şar yê Colemerg zî aşkere kerd ke serva protestokerdişê qetlîam, ê didi rojî cuwyan vindarnenê.
“Ma şima ra serberz ê”
Enqera de zî bi şiyayiş qetlîam rê nêrazîbiyen damûsniya. Nûmayiş de panqarta “Cizîr de jew bodrimî de merdimatî ame qetilkerdin” hewadiya û sloganê zey, “Kiştox dewlet do hesab bido” berz bî.
Şêlig Cedeyê Yuksel de, resya jû komekê bîn û panqarta “rexmê serdin, veyşanî, teyşanî, tanq û topan şima çok nêda ro” akerdî. Azayê Lijneya Rayverîna Navendî yê HDP Berfûm Çolak qisey kerd. Çolak ard ziwan ke, Cizîr de merdimatî amê qetilkerdin û da zonayene ke, yê ke vera nay veng nêvejnenê dê bibê piyakarê sûcî. Hemserokê HDP yê sûk Îbrahîm Bînîcî zî aşkere kerd ke, Kurdî dê ti wext polîtîkayanê înkar û îmha qebûl nêkerê.
Dayikê haşitî zî ver temsîlkariya Neteweyê Jûbiyî de nûmayişê ronişten viraştî. Nûmayişê dayikan rexmê ablûqa û hewayê serdin dewam kerd. Sermiyananê Neteweyê Jûbiyî dayikan ra aşkere kerd ke destê înan ra teba nîno.
“Kiştox dewlet do hesab bido”
Qezayanê Stenbol de zî Kurdî meydanan de bî. Şêligo ke ser vengdayenê ESP ver Cemxaneyê Gazî de are bî hetê polîsan amey manîkerdin. Nûmayişkarî rexmê barîqatanê polîsan bi sloganê “Kiştox dewlet do hesab bido” destpa rayşiyîn kerdî. Gencan bi fîşeganê hewayî û bi sîyan (kemer) cewab da êrişanê polîsan. Herzewbîn qezayanê zey Sancaktepe, Kuçukçekmece, Beyoglû de zî nûmayişê protestoyî viraziyay.
Îzmîr ra heta Manîsa…
Qezayanê Îzmîr Menemen, Karabaglar, Konak, Bayrakli, Bûca û Bornava de zî welatijî vejyay meydanan û veng day xoverdayişê Cizîr. Ser mudaxaleyê polîsan, mavêna gencan û polîsan de pirodayişî vejyay. Gencan bi fîşeganê hewa, bi bombeyanê veng û molotofkokteylan cewab da êrişanê polîsan.
Nûmayişî dê biramê
Taxa Konak Kadîfekale de Kurdî vejyay meydanan û şiyayiş viraştî. Polîsan mudaxaleyê nûmayişkaran kerd. Welatijan çarçoveyê xopawiten de cewab da êrişanê polîsan. Polîsan 8 nûmayişkarî girot bin çiman. Taxanê Doganlar, Eskî Çamlik, Asarlik, Yamanlar û Onur de zî slogana “Bicuw xoverdayişê Sûr û Cizîr” berz bî.
Wehşeta Cizîr Manîsa de zî hetê seyan kesan protesto bî. Welatijê ke vejyay meydanan nûmayişê vengvetiş viraştî û sloganê “Kiştox Erdogan” berz kerdî. Hemserokê qezaya Tûrgûtlû Selahattîn Daglî aşkere kerd ke, heta ke qetlîamî dewam bikerê, nûmayişê înan zî dê biramê û vila bibê.
NAVENDÊ XEBERAN