Seba raydayîşê weçînayîşê 24ê Hezîrane, ewro roja peyêne ya qeydviraştişê rayanî ya Ewropa ya. Babete ser o NAV-DEMî îzehetêko nuştekî da û qala muhîmîya rayanê Ewropaye kerd. NAV-DEMî îzehetê xo de wina va: “Bitaybetî kurdistanî û tirkîyayijê ke Almanya de cuyenî, ganî bi tesilê ewro qeydê xo bivirazî. Binkewtişê AKPyî girêdayeyê rayanê Ewropa yo.” Weçînayîşê 24ê Hezîrane rê 43 rojî mendî û goreyê nêyî her ke şono lez dîyeno xebatanê weçînayîşî. Nê xebatan ra yewe zî viraştişê qeydê weçînayîşî yo. Seba ke bişînbo ray bêro dayîş, ganî herkes qeydê xo yê weçînayîşî bivirazo. Bitaybetî yê ke teberê welatî de rayan danî, ganî ewro heta saete 16.00 qeydê xo yê weçînayîşî bivirazî. Seba viraştişê qeydê weçînayîşî, heta saete 16.00 muracatê konsolosxaneyo ke tewr nizdîyê şima yo bikerê. Weçînitoxê ke weçînayîşê bînan de ray dayî, ser keyepelê https://secmen.ysk.gov.tr /ysk/secmenBilgiYurtdisi. Jsp ra eşkenî qeydê xo yê weçînayîşî kontrol bikerî. Eke şima welatêko bîn yê Ewropa de verê cû ray dayo zî, ganî şima keyepelê Heyetê Weçînayîşî yê Berzî (YSK) de qeydê xo yê weçînayîşî kontrol bikerî. Rayê Ewropaye zaf muhîm î Merkezê Komelê Kurdê Demokratîke yê Almanya (NAV-DEM) zî îzehetêko nuştekê da û veng da weçînitoxan. Îzehet de ame vatiş ke ‘beno ke qerarê weçînayîşê verwextî peynîya faşîzmê Erdogan û Bahçelîyî bîyaro’ û îzehet wina dewam kerdo: “Stratejîyê bingeyînî yê AKP û MHPyî qetilkerdişê kurdan o. Şarê kurdî do îttîfaqê AKP û MHPyî qebul nêkero û do hesabê qirkerdişan biperso. AKP û MHP kewtî mîyanê tengasî, ganî bi tesilî rayê bêrî dayîş.” Ganî bi ruhê seferberî derbaz bibo Îzehet de ameyo vatiş ke ganî ê bi hawayo seferberî hereket bikerî û wina domîyayo: “Rayê Ewropa zaf muhîm î. Xebatê ke no proses de bêrî kerdiş, beno ke vernîya polîtîkaya qirkerdişî bigîrî. Bitaybetî kurdistanî û tirkîyayijê ke Almanya de cuyenî, ganî bi tesilê ewro qeydê xo bivirazî. Eke şima qeydê xo nêvirazî, şima nêşênî raya xo bikar bîyarî. Heme hetê ke girêdayeyê NAV-DEMî yî, wa merkezê xebatanê hemînan de xebatê weçînayîşî bibî. Heta 19ê Hezîrane xebata ma ya bingeyîne xebata weçînayîşî ya. Wa heme tevger, dezge, komîsyonê herême û mîyanneteweyî û hêzê îttîfaqî wina têbigêrî.” Êdî wextê têhetameyîşî ameyo Hemsereka Pêroyî ya HDPyî Pervîn Buldane zî derheqê weçînayîşê 24ê Hezîrane de qisey kerde. Buldane îxtîmalê derbazbîyayîşê barajî yê HDPyî ser o wina va: “Goreyê heme anketê ke yenî viraştiş, HDP dormeyê se ra 10î de ya. Erdoganî vatbî ‘HDPyî binê barajî de biverdê’ û wina aseno ke do zaf bêrî HDPyî de. Cok ra ganî şarê ma zaf hesas bibo. Êdî wextê bin banê HDPyî ameyîşê têhetî ameyo. Kurdê ke heta nika rayê xo dayênê AKPyî, wa baş bifikiryî. Ganî bi hawayo bihêz ma wayîrê HDPyî bivejyî. Helbet do hêrişê HDPyî bikerî û rayan bitirawî. Ganî ma wina bikerî ke eke bitirawî zî ma barajî derbaz bikerî.” MERKEZÊ XEBERAN