Partîya Demokratîke ya Şaran (HDP) ke seba weçînayîşê 24ê Hezîrane lîsteya xo ya parlamenteran aşkere kerde, nika zî namzedê xo dayî şinasnayîş. Xeylê kesî beşdarê kombîyayîşê daşinasnayîşî bîyî û kombîyayîş bi coşêko gird derbaz bî.
Salona ke kombîyayîş tede ame viraştiş de pankartê ‘Bi cinîyan bedilîyeno’, ‘Ma tîya de yî, ma eşkenî’, ‘Bi to bedilîyeno’ û sewbîna ameyî aliqnayîş. Tayê cinîyî bi cilanê xo yê herêmkî beşdarê kombîyayîşî bîyî. Namzedê HDPyî yê Serekkomarîye Selahattîn Demîrtaşî zî mesajêk erşawite kombîyayîş.
Hemsereka HDPyî Pervîn Buldane qisey kerde. Buldane va ‘sey HDP îdîaya ma ya têkoşîn û demokrasî zaf gird a’ û wina dewam kerde: “Ma veng danî heme cinîyan ke ma mehkûmê tarîtîye û koletîye nîyî. Ma her roje hîna zaf zêde benî. Ma zincîranê koletîye şiknenî. Ma bi por, tolbende, egal û tilîlîyanê xo yenî. Ma do qesre sey Wezaretê Cinîyan bikar bîyarî. Serkewtiş yê cinîyanê serewedaritoxan o.”
Ma her roje nê astengîyan hîs kenî
Dima ra HDPyî bi kombîyayîşêk namzedê xo yê cinîyî zî aşkere kerdî. Kombîyayîş de vilaweka cinîyan ya HDPyî ameye wendiş. Vilaweka cinîyan ya HDPyî de wina ame vatiş: “Ma cinîyî her roje ser îrade, beden, nasname û keda xo de zextan hîs kenî û vera astengîyan de têkoşîn danî. Na dinyaya ke qural û qaydeyê ci hetê camêrdî ra yena dîyarkerdiş de tewr zaf ma cinîyî astengîyan şinasnenî. Seba ke dest ronîyena ser kede û wextê ma, ma zafaneyê wextê xo mitbaxe de yan zî bi ewnîyayîşê doman û extîyaran derbaz kenî.”
Ê nêşênê vengê cinîyan bibirnî
Vilaweke de ameyo vatiş ke AKP hewl dano heme azadîyan asteng bikero û îzehet wina dewam kerdo: “Ma wazenî qala xo bikirêşî sîyasetî mîyan, labelê ê wazenî herkesî bêveng bikerî. Nika zî wazenî heme hêz bidî destê yew merdimî. Çimkî êdî nêşênî îdare bikerî. Seba ke nê krîzî derbaz bikerî, rejîmêko winasî hedef kenî. Nê şîddet û dişmenî ancax bi piştîdayîşyewbînanî yê cinîyan vindenî. Ma vera rejîmê serekîye de sîstemêko hîna zaf azadî, zafane, demokrasî û sewbîna hedef gêno pawenî. Ma do sîstemêko winasî awan bikerî.”
Vilaweke de xeylê madeyî ca girewtî
Vilaweke de ca dîyayo xeylê madeyanê cîya-cîyayan. Nê madeyan ra tayê ci pawitişê qezencan, pîya hereketkerdiş, awankerdişê Wezaretê Cinîyan, xo bi xo qerar girewtiş, cîyabîyayîşê cinîyan, azadîya bawerî, fermîbîyayîşê 8ê Adare, perwerde û xizmeto bêpere û seyewbînan, vera cîyayîyan de rêzgirewtiş, bi qerarê xo dayîşê hûmara domanan, seyewbînanîya zayendî, aktîfkerdişê peymananê mîyanneteweyîyan, wedarnayîşê zayendperestîye û cîyakarîye, heme hetan de seyyewbînanîya cinîye û camêrdî, qedênayîşê şîddeto ke vera cinîyan de beno, awankerdişê Xeta Şîddetî ya ALO, mehkemekerdişê kesê ke engîşta înan şîddet vînayîşê cinîyan de esto, akerdişê Merkezê Krîzî yê Tecawizî û sewbîna xeylê madeyê bînî ca girewtî.
MERKEZÊ XEBERAN