Bes o hende kiştiş, komkiştiş û qirkerdiş; bes o hende koçkerdiş û seyekmendi.
Çîyo ke fehm bîyo pêrodayîş û herban de çew ser nêkewto, serfiraz nêbîyo.
Yew rey dişmenan waştî ke erdê sewbîna mîletan bigêrî bindestê xo, verê înan vînî kerdo.
Her çiqas ser kewtî û nê erdan girewtî binê destê xo zî esas ê bine şîyî. Kam mîlet est o ke dagirkeran hes kerdo û heskerdişî reyde ca dayo.
Şarî caran ê qebul nêkerdî. Û caran nêvatî ê serekê ma yî. Nê dagirkerî peynî bi peynî nê erdan û erdvînayîyan ver ra dayî şîyî. La peyê xo de se ver ra dayî?
Welato serûbinkerde û welato têmîyankewte ver ra dayî. Nê semedî ra dagirkerdiş û zeftkerdiş çîyê ke baş nîyî.
Şaro ke welatê xo ciwîyeno mecbûr o ke welatê xo vera dişmenan ra bipawo. Dişmen biyero erdê to îşgal bikero û ti zî desttêbeste temaşe bikerî, na hawa çî est o dinya de?
Kam şaro ke seba erdê xo bipawo dişmenî ra pêro dayo û sewbîna mîletan ra rêz dîyo, paştî dîyo û no paştî ca bîyo şaro xerîb ameyo têhet pîya nê dişmenan ra pêro dayo, ca bîyo hîsanê xo reyde paştî dayo û ca bîyo welatê xo de nawnayîşan reyde vengê xo berz kerdo paştî dayo.
Kam mîletî hetê dagirkerdoxan ra kewtî bindestî û na bindestî qebul nêkerdî, têkoşînî dayî peynî bi peynî zeynayî û ser kewtî.
Şaro bindest mafdar o ke xo bindestî ra bixelisno û no têkoşînê înan pîrozî ya.
Bê şik têkoşînê înan hetê heme mîletan ra zî rêz vîneno.
Her mîletî rê welatê ey ey rê pîrozî ya. Mîlet no erd û herre de xo şinasnayo û pîl bîyo. Hem vîrameyîşê ey tîya de bîyo.
Ziwanê xo ewta de bander bîyo, dost û şinasê xo tîya de dîyo. Xo tîya de şinasnayo, wayîrê yew kamîye bîyo. Û bîlasebeb dagirkerî bîyerî welatê ey îşgal bikerî, o qebul keno? Ney.
Welat sey ma yo.
Sey maye dayox o. Girewtox nîyo. Welat her tim dano, bê vera dano. Vera dayîşî ra tena yew çî wazeno. O zî pawitiş o. Welat wazeno ke her halî de bipawîyo. Tek waştişê ey pawitiş o.
Dinya çendê ke baş bîya, eke dinya tîkê xo ameya, tîkê dinya de pêameyîş bîyo a zî xeyrê pêrodayîşê heqdarî ser ro bîya.
Caran wina yew şik denêkewo zereyê ma ke neheqî bizeyno. Na hawa çi mumkin nîyo.
Ma vînenî ke çi ca de pêrodayîş bibo, mîletê xerîbî polê(het) dagirkeran nêtepîşenî, polê welatpawitoxan tepîşenî. No zî moral û motîvasyon dano welatpawitoxan.
Dinya goreyê dîyalektîkî têgêrena. Goreyê dîyalektîkî heme çîyî de eyînî û neyînî est o. Û mîyanê xo de pozîtîf û negatîfî hewîneno.
Pêrodayîşê negatîf û pozîtîfî ko tim bibo. No zî qanûnê dinyaye yo. Ma nînan ra nêtersî. La xayeyê ma o yo ke nê dîyalektîkî de ma dinya hîna weş bikerî.
Karê ma yê eyînî û pozîtîfî zaf bibî. Nê zî destê ma de yî.
Bes o ke ma hêvîyê ma nêqedîyî û ma tim hêvîyanê xo ganî bitepişî, têkoşînî ra fek ver ra nêdî.
Zerweş ESNAW