Weçînayîşê 7’ê hezîranî de HDP serkewtişê girdi ra ravêrîyay û serkewte. Nê weçînayîşê 7’ê hezîranî seba bindestê şaran ra dîrokî bî.Tirkîya de bi raya verêna ke no hewa yew weçînayîş virazîya. Çimkî nê weçînayîş bi tena serkewtişê HDP nêbe û serkewtişê heme şaran bi.No weçînayîşî de bi binê banê HDP de heme rengê şaran şawîya meclise.
Bi esil demokrasîya heqîqî û raştine no hewa yew demokrasi ya şaran a. No sebeb ra yo ke pergalê erka dewlete hende zaf HDP ra tersena. Dîrokê Tirkîya de hende zaf weçînayîşî bî labelê hewayê weçînayîşê 7’ê hezîranî bi nimûne çinî yo. Heyana ewro erka dewlete û çapemenîya zurikere HDP rexne kerdê vatê; “Çîyrê HDP partîya Tirkîya nêbena.”
Ewro zî seba ke HDP bîya partîya heme şaran û no ray zî heme tewr ra gala hêrîşa HDP kenê. Kanî demokrasî û kanî legal siyasete? HDP heyana ewro bi hezaran reyde raştê hêrîşa qirêjî amey. Hema zî nê hêrîşaya qirêjî dewam kena. Çîyo ecêbo ke heme kes nê qirêjîya AKP ra bêveng manenê û temaşe kenê. No hewa qirêjî çiray yew dewlete de nêvejîya ya û peyda nêbîya. Tayyîp Erdogan sirf seba saltanateya û padîşaye ya xo hende çilginey keno. Tabî ke Tayyîp tornê kirteyê Osmanî yo, Osmanî seba saltaneteya xo gedeyê xo lajê xo, birayê qetil kerdî. Tayyîp zî seba koşka xo heme şaran qetil keno.
Provokasyonê Agirî û provokasyonê Edena û Mersînî normal yew provokasyon nêbe. No hewa yew qirkerdişê provokasyonî yew çilgineya girde bî. No weçînayîşî de heme kesan Tayyîpî ra provokasyonî pawitê labelê nê hewa yew çilginey nêpawitê. En çilgineya girde zî 5’ê hezîranî de mitînga Amedî de virazîyay. Amed de 5’ê hezîranî de yew qirkerdişo girdî ra ravêrîyay. AKP nê mitînga Amedî de hem bombeyî teqnayî û tira dime zî gaze eşte şarî û ana kerd ke ayê ke ganî mendî wa êzî nê îzdîhame de binê lingane de yewbînan bibelxiçinê.
Û nê qirkerdişê girdi ra dime zî waşt ke şar serehewano û weçînayîş îptal bibo. No warî de AKP yew planê qirkerdişê girdî viraşt labelê nê planê qirkerdişê girdî nêtepişt. Nê weçînayîşê 7’ê hezîranî de şarê kurd dersê AKP weş day û AKP Kurdistanî de rezil û riswa bî. AKP nê ray zî serkewtişê HDP hezim nêkerd. Şarê Amedî hema binê bandorê qirkerdişê 5’ê hezîranî ra nêvîyarnay bî û ina ray zî AKP hîzbê qontirayê xo kerdî dewre.
No warî de en rewşa dejayîşî zî çapemenîya tirkan rewşa şerê taybetî gurênay. Sakî Amed de HDP nê weçînayîş de serkewti û na ray zî seywareya îslama kena. No hewa yew rewşa zurikerî yew rewşa alçaxeya û qelemşoreya şerê taybetî ya.
No weçînayîşê 7’ê hezîranî de heme çar partî serkewtişê xo îlan kerd. Enka zî hukûmat senîhewa virazîyeno û kam kamî reyde koalasîyonê hukûmatî virazeno. No warî de çen hebî weçînitî estî. Nê weçînitan ra bi yewine koalîsyonê AKP û CHP. û weçînitê dîyene zî CHP û MHP yo.
HDP zî teberî ra paştî destek bido koalîsyonê CHP û MHP no hewa yew rewşe zî HDP qebûl kena nêkena hema dîyar nîyo. Weçînitê hîrine zî heme çar partîyan ra yew koalîsyone vîyarteyê weçînayîşî virzîyeno û heyana ke yewna weçînayîşo newe beno. Eke nê heme hîrê şikê weçînayîşî nêvirazîyê se 45 rojan mîyanî de hikûmat nêvirazîyo se sernawera yew weçînayîşê rewî virazîyeno. No warî de rewşa HDP zî bi îhtîmalo girde zî HDP muxalefetî manena.
Sewbîna tewr zî senîhewa beno û çi rewş virazîyena ko çen rojan mîyanî de dîyar bo. Ancî zî no warî de Serekwezîr Ahmet Davutoglu hema şerm nêkeno ke vano; “Wa HDP seba ravêreyî ya çareserî ra game aver fîno”. No tewr zî yew rewşa pîşkîneya û qawesizeya. AKP hînê nê rojî ra pey seba şaran ra îtîbarê xo vinî kerdo.
ZAZA CEBELÎ