Artêşa tirk herêma Firatî de Kantonê Efrînî tehdît kena û dewanê kantonî ser o bombe varnena. Heto bîn ra ewro Rojawanê Kurdistanî de weçînayîşê Meclîsê Îdareyê Herême yê Vakurê Sûrîye dest pêkeno.

Babete ser o rîsipîyê eşîrê ereban û Hemserekê Kongreya Komelo Demokratîk (KCD) Berdan Ozturkî qisey kerdî. Endamê eşîra El-Emêratî û Endamê Meclîsê Qanûnviraştoxî Abdulhemîd El-Seyîdî va ‘ma do bi kêfweşîyêka girde beşdarê weçînayîşan bibî’ û wina dewam kerd: “Ma do vera xo bidî sindoqan û bi îradeya xo temsîlkaranê xo biweçînî. Tehdîdê artêşa tirkî vera yewîya şarê herême de nêresenî amancê xo.”



Eşîra El-Bobne ra Endamê Meclîsê Qanûnviraştoxî Salîh Sefîrayî zî va ‘şarê herême babeta yewîye de heme şaran rê bî nimûne’ û wina domna: “Mîyanê ma de nîjadperestîye rê ca çin o. Heta ke ma serbikewî ma do projeyê federalîye pê bîyarî û ma do ser nê esasî rayîrşîyayîşê xo bidomnî. Kesêk nêşêno îradeya ma bişikno.”



Wa herkes reyê xo bido



Rîsipiyê eşîra El-Bobne Ebdo Hisên Xelîlî zî wina va: “Tirkîya wazena bi tehdîdanê xo vernîya federalîya demokratîke bigîro. Tirkîya tena menfîetê xo ewnîyena, cok ra çiqas hêzê xo deko herême zî do sernêkewo. Îradeya ma û ya şarê ma artêşa Tirkîya ra bihêzêr a. Ez veng dana heme şarê herême ke wa şêrî ser sindoqan û reyanê xo bidî.”


Ma do destek bidî weçînayîşî

Heto bîn ra Hemserekê KCDyî Berdan Ozturkî zî derheqê weçînayîşî de va ‘şarê Rojawan û Vakurê Sûrîye vera hêrişê terorîstan de xover dayî’ û wina dewam kerd: “Xoverdayîşê înan tarîxê dinya de bi hawayo serkewte ame nuştiş. Amancê ma taqîpkerdişê weçînayîşê îdareyê herême yê Federalîya Demokratîke ya Vakurê Surîye ke prosesêko tarîxî û hesas de yeno viraştiş o. Do heme şarê Vakurê Sûrîye bi îradeya xo ya bihêz reye xo bido kesanê munasîban.”


Saya Ocalanî de pê ame

Ozturkî dewamê qiseykerdişê xo de wina va: “Ma vînenî ke Federalîya Vakurê Sûrîye seba heme Sûrîye û Rojhelato Mîyanênî nimûneyêk baş a. Çimkî no sîstem de heme hetî û dînî bi ruhê komînalî ca gênî. No proseso hesas saya Rayberê Şarê Kurd Abdullah Ocalanî de pê ame. Ma Vakurê Kurdistanî ra ameyî Rojawan. Ma do bibî şahid û destek bidî weçînayîşê Îdareyê herême yê Federalîya Vakurê Sûrîye. Ma na roje seba heme parçeyanê Kurdistanî û şaranê bindestan pîroz kenî.” 


NAVENDÊ XEBERAN