Dagirkeranê serê axa Kurdistanî û hemkaranê înan ê emperyalîstan bi plan û projeyêke bi koneyî û bêbextî raste ra wedartiş û qedênayîşê qiwetê pawtişê şarê kurdî dabi verê xo. O plan û projeyê înan plan û projeyêke derg bi.
***
Lîngêka a bêbextîya înan girotişê Rayberê Şarê Kurdî bi û lînga bîne raste ra wedartişê Qiwetê Pawtişî yê Şarê Kurdî bi ke xo ra dimayê ay awayî ra bi awayêke otomatîkî qedênayîşê şarê kurdî heta bi hetayî kewtêne kar. Serra 1999 ra heta 2013 bi seyan dek û dolabî ro serreyê gerîlan çarnayî la her hewe de Rayver û Qiwetê Pawitişê Şarê Kurdî dek û dolabê înan xira kerdî. Wexta hemverê gerîlan planê înan veng vecyayî verê xo da xozaya Kurdistanî û vakur de bi viraştişê bendawan û qaleqolan waşt derbe bidê şarê kurdî ro. Projeyê înan o peyîn ke heme çimesûrîya xo tede ca kerda viraştişê çeteyanê DAIŞî yo ke na ray kurdê sivîlî bi xo hedef ameyê ramoştişî. Dagirkeran her qayde planî ceribnayî. Girotişê Rayverê Şarê Kurd, operasyonê serê gerîlan, xirapkerdişê xoza û bi projeyê xo yo peyîn ke heme hemkarê xo yê emperyalîstî ancî kişta xo de bi ca kerdî. Makîneyêke bi nameyê DAIŞî çerx kerd û ramna kurdê sivîlan ser. Di enî hemleyê înan ê peyînî de bêraybîyayîşê kurdanê Şengalî û bê wayîrveradayîşê qiwetê a herême, bi sebebê dîtişê zirarî.
***
La heto bîn raybîyayîşê kurdanê Rojawanî ke di pratîkê Kobane de xo mot ra heme plan û projeyê înan ro înan çarnayî a. Kurdî bi xoverdayîşêke nêvînaye û bi çekê xo yê qican û bawerîyêka pîle hemverê tanq û topanê înan de vindertî. Şoreşê Rojawanî ke bi rengê cînîyan xemilnayeyo balê heme dinya ant. Xoverdayîşê Kobanê heme çimê ke ro kurdan korrî bî û goşê ke ro înan kerrî bî kerdî ya û hesabê dagirker û emperyalîstan o şaş Kobanê ra ro înan a çarna. Hemverê çeteyanê ke viraşteyê dagirker û emperyalîstan ê xoverdayîşê Kobanê bi roşnîya rayîrê yewîtîya kurdan. Loma pêwa ke zerra kurdan bi qirkedişê ke Şengal de virazya bi letey, xoverdayîşê Kobane kurdan rê bi qiwet, bawerî û viraştişê yewîtî. Loma ma eşkenê vacê ke teberê êşê ke ameyî antişî serra 2014’ine serra kurdan bî.
***
Serra 2014’î kurdan rê şahidîya xoverdayîşî, serkewtişî û yewîtî kerde. Bi hêvîya ke şarê ma yê Vakur, Vaşûr û Rojhilatî ro perçeyê xo yê Rojawanî wayîr vecîyo û serra 2015 bikero serra yewîtî û azadîya her çar perçeyan serra newî ro Rayver, gerîla, giroteyê zindanan û heme şarê ma pîroz bo.
Nesrîn NAVDAR