ZAZA CEBELÎ
Serra 2016 de zahf çîyê muhîmî qewimîyayî. Nê qewimîyayîşan mîyan de yê tewr muhîm zî Kantonê Rojawanî bî. Rojawan de bitaybetî şarê kurd û sewbîna şaran verba wehşetê çeteyanê DAIŞî de destanê qehremanî nuştî û hema zî nusenê. Serra 2016 morê xo da serkewtişê Rojawanî ro û xelasnayîşê Şengalî. 2016 de qewimîyayîşî bînî zî xoverdayîşê îdareyê esasî Sûr, Farqîn, Cizîr, Nisêbîn, Şirnex, Colemêrg de xoverdayîşê destanê dîrokî ameyî nuştiş.
Nê xoverdayîşê destanê qehremanî her wext tarîxê kurdan de nexşê muqadesî reyde yenê nuştiş û cayê xono xusûsî tepîşenê. Serra 2017 bena fînalê Rojawan û Vakûrê Kurdistanî. Nê warî de wa ti kes nêkewo rewşa bêhêvî. Na serra 2017 bena serkewtişê kurdan û heme şarê bindestan. Rojhelato Mîyanên de kayê kişikî kay benê û nê kayê kişikî de kurdî hemleyanê muhîman kenî. Hem texteyê kişikî ser de û hem zî yew bi yew şerî mîyan de nê hemleyan îcra kenê. Rojhelato Mîyanên de heme hêzê emperyalî yê girdî wazenê ke sernawera xêzî nexşî xêz bikerê.
La enka zerrîya şorişî Rojhelato Mîyanên de û Rojawanî de erzena. En helqaya rêza zeyîf Rojawanî de qerfîyaye û na rêze heme Rojhelato Mîyanên de vila bena. Vakûrê Kuristanî de kozîya kilaya adirî her roj hîna zaf xemilîyena. Na kilaya şorişî ya adirî ver bi pawitişê teqayîşî de ya. Kam wext, kam rojî de teqîyena rewşa limitî de ya.
Şewa serrneweyî ya 2017 de ancî rewşa qirkerdişî ra vîyarte. La çi heyf o ke nê teqayîşî ke bi nameyê çeteyê DAIŞî ra benê, pêro zî vera kurdan de ameyî viraştiş û nazî vera xerîban, ejnebîyan de ameyî viraştiş.
La nê qirkerdişî pêro tesadufî nêbî. Qirkerdişê Pirsûsî, Anqara, Edene, Amed, Dîlok, Sultanahmet û Ortakoy. Nê qirkerdişan ra bi tena Sultanahmet û Ortakoy de kurdî çinêbî.
La nê wirdî qirkerdişan de xerîbî û ejnebîyî bîy. Yanî ewta de yeno vatiş ke nê heme qirkerdişan de, DAIŞ bi xo nê teqayîşan nêviraşto. Eke bi xo biviraştê, ganî verê verkan leşkerê tirkan û polêsê tirkan hedef bigirotê.
Yew qala Tayyîpî esta, her wext fekê xo de hewayê vîncî caweno û hesaban ra qale fîneno Ewropa û vano: “Şima marî veradî xo de weye kenê, la eke yew roje no mar zêlîya xo şima de dano.” La kam eyro marî veradîya xo de weye keno, zaf eşkera yo. Vizêrî bekaya na dewlete vera kurdan de Hîzbullahî gurênay la eyro HUDA PAR û çeteyanê DAIŞî vera kurdan de gurênenê.
Wexto ke ma tarîxê Tirkîya ra ewnênê Teşkîlatê Mahsûsa ra heyana eyro Tirkîya nê MÎTî û çeteyê xo weş gurênayî. Wextê Osmanî de seba textê Sultaney ra birayî bira kiştê û pîyî ewladê xo kiştê.
Serra 1993 de Tirkîya seba kayê xono gemarî ra çend generalê xo û albayê xo kiştî. Tirkîya nê warê gemarî de zaf westa ya. La eyro Tayyîpî veba kurdan de heme qoz û gemarê xono taybetî pêro gurênay.
Eyro zî milayî û hesaban ra nuştoxî fetwa danê û nê fetwaya xo de vanê: “Kam HDPîyan bikişo qetlê înan wacîp o û eke nazî PKK ra nêwanê teror na bikişê û nazî bikerê zindan.” Seba serrneweyê Noelî ancî Dîyanet û muftî fetwa danê û vanê: “Noel yê ma nîyo yê şeytanan o.” Nê fetwayî dima ra zî orteyê Stenbolî Ortakoy de qirkerdiş virazîyeno. La nê pêro qewimyayîşî tesadûf nîyê. Senî hewa orteyê Stenbolî de qirkerdiş virazîyeno û no qetilkar polanê xo têşaneno û remeno? Nê heme senaryoyî rewşa gemarinî ra ameyî viraştiş.
Her rewşa kaos û krîzî de yew peynî esta û enka zî peynîya Tayyîpî ameya. Nê 15 serrî yo ke Tayyîpî nê welatî hewayê hêgayê xo, hewayê ciwênê xo kut û pelixna.
Enka zî vano pergalê Serokey bidê mi nazî hukmatê koalîsîyonî reyde gure nêbeno û kaos virazîyeno. Sankî heyana eyro koalîsyon bî û nazî muxalefet bî? Nê heme hîkayeyê Tayyîpî ra şar senî hewa xapîyeno, no zî yew çîyo ecêb o? Eke nê welatî de her roj qirkerdişî virazîyenê û nê qirkerdişan de bi hezaran ra merdimî kişîyay û hema zî ne Serekwezîr û ne zî Wezîrê Zereyî îstîfa nêkeno.
En çîyo ecêb zî qet ne yew çapemenî, yew roşnvîr û nuştox nêvano qey yew îstîfa nêkeno? Bi tena yew çete mendo û no çete heme qeraran dano. Rewşa Tirkîya zî her wext binê tehluke de ya. Muxalefet zî hewayê bizêka bêwexte bêçare bareno. Tayyîpî kindirê Bahçelî û bizêkê bêwextî giroto binê destê xo û kay dano. La ti senî muxalefet î Kemal Kiliçdaroglu û bizêko bêwext?
Roje yeno dewran vêreno. Roje yeno, hesap yeno persayîş. La zimistan serd û pûk o û wesar paweno. Wesar yeno heme ganîyî gonîya xo bedilnenî û xo sernawera ganî keno. Wesar yeno heme dar û ber pûndê xo rişneno, vilika xo akeno û heme cayî xemilyenî. Aşma wesarî xeyrên a, zerên a. Wa serra 2017 heme şarê ma rê xeyrên bo û bimbarik bo.