Emser serra 40. ya awanbîyayîşê Partîya Karkeranê Kurdistanî (PKK) yo. Na çarçewa de aktîvîteyî nê 20 rojî ra zêde yo ke Kurdistan, Rojhelato Mîyanên û cayanê cîya-cîyayan yê dinya de dewam kenî. 

Kurdê Belçîka zî Leuvenî de ameyî têhet û awanbîyayîşê PKKyî pîroz kerdî. Bi hezaran kesî beşdarê aktîvîteyê pîrozkerdişî bîyî. Hemserekê KONGRA-GELî Remzî Kartal zî beşdarê pîrozkerdişî bî û ewja de qiseykerdişêk kerd. Kartalî qiseykerdişê xo de bale ant azadîya Rayberê Şarê Kurd Abdullah Ocalanî ser û seba ke seferber bibî, veng da heme kurdan.

Hemserekê KONGRA-GELî Kartalî destpêkê qiseykerdişê xo de serra 40. ya awanbîyayîşê PKKyî pîroz kerd û wina va: “PKKyî ra ver kurdî donemêko tarî de cuyayênê. Kurdistan mîyanê tarîtîye de bî. Ti kesî ra veng nêvejîyayêne. Dişmenê ma 4 parçeyanê Kurdistanî de hêvîya şarî şiknabî. Tam zî wextêko winasî de Rayber Apo û embazanê ci seba cuya azade mudaxaleyê tarîxî kerdî. Mudaxaleyê sîstemo ke Şerê Cîhanî yo 1. de kerdbî 4 parçe, kerdî.”


Ma minnetdarê şehîdanê xo yî

Kartalî dewamê qiseykerdişê xo de dîyar kerd ke ê Hakki Karerî ra heta Delal Amede minnetdarê heme şehîdan î û wina domna: “Ma hemînan ver de vileyê xo çewt kenî. Ma soz danî ke amancê înan bîyarî ca. Rayber Apo Îmrali de binê esaretêko gird de yo û ganî heme kurdî xo no het de berpirsîyar bivînî. Şarê kurd 4 parçeyê Kurdistanî de têkoşînê azadîye meşneno û bi felsefeya Rayber Apoyî Rojhelato Mîyanên de tarîx nuseno. Tena seba xo nê, seba heme şaran û seba ke heme şarî bi nasnameyo azad bicuyo, têkoşîn dano. No têkoşîn zî rayberîya cinîyan de yeno kerdiş. Bi nê têkoşînî sîstemo ke bi serran o ma bêheq û bêhuqûq verdano yeno parçekerdiş û herinda ci de sîstemêko demokratîk û azadîwaştox yeno awankerdiş.”


Eke CPT nêşêro, ma do xoverdayîşî gird bikerî

Kartalî qiseykerdişê xo de seba seferberîye veng da kurdanê ewropa û wina va: “Sere de şarê ma yê Ewropa, kurdê çar parçeyanê Kurdistanî û dostê ma, ganî seba ke Rayber Apo serra 40. de azade bibo, seferber bibî. Ganî ma sere de hetê sîyasî, dîplomasî, ciresnayîşî û heme waranê komelkîyan de têkoşînê xo berz bikerî. Çimkî ewro ma nêzanî ke rewşa Rayber Apoyî çî ya? Ma derheqê zanayîşo ke dişmen vila keno ver etirîyenî. Ma Strasbourg de çalakîyêka girde domnenî. Ganî CPT şêro derheqê cuya Rayber Apoyî de cigêrayîşan bikero û dima ra îzehetêk bido. Heta ke CPT, keye, avûkat û heyetêk nêşêro hetê Rayber Apoyî ma do xoverdayîşê xo gird bikerî. Cok ra barêko gird keweno şarê ma yo Ewropa ser. Ganî ma serra 40. de fedakarîyêka girde bikerî û wextê xo bidî. Ma ancax bi no hawa eşkenî çalakîyê wayîrvejîyayîşê Rayber Apoyî gird bikerî. Mesajo ke ma danî şarê xo yo welatperwer no yo; serra 40. serra fînalî ya. Seba azadîya Rayber Apoyî û çareserkerdişê problemê kurdî firsendêko tarîxî yo. Ganî herkes bi nê zanayîşî hereket bikero.”

Qiseykerdişan ra dima aktîvîte bi deyîrê hunermendanê Cemîl Koçgirî, Serhat Çarnewa û yê hunermendanê herême heta saetanê ereyî dewam kerde.  


ANF/BRUKSEL