Sey her serre emser zî serrgêra ronîyayîşê PKKyî bi coş û moralêko gird yena pîrozkerdene. Hewteyêk o ke bitaybetî Ewropa de pîrozkerdişê serrgêra PKKyî ameyo destpêkerdene û pîrozkerdişî vilayê zaf cayan benî. Na çarçewa de Almanya, Fransa û Avusturya de xeylê cayan de pîrozkerdişî dewam kerdî.
Bajaranê Dusseldorf, Munîh û Hîldesheîmî yê Almanya, bajaranê Montpellîer û Rennesî yê Fransa û paytextê Avusturya Vîyana de xeylê kesî beşdarê pîrozkerdişan bîyî. Dusseldorf de 1500 kesî beşdarê pîrozkerdişî bîyî û qiseykerdişê sîyasetmedaran ra dima hunermendî vejîyayî sehne û şewe bi siloganan qedîyaye. Munîh de zî nizdîyê 800 kesî beşdarê pîrozkerdişî bîyî. Salone de posterê Ocalanî û kadroyanê PKKyî ameyî aliqnayene. Xeylê hunermendî pîrozkerdiş de cayê xo girewtî. Bajarê Hîldesheîmî de zî pîrozkerdiş vîrazîya.
Bajarê Rennesî de zî pîrozkerdiş virazîya û Hemserekê KONGRA-GELî Remzî Kartalî qisey kerd. Kartalî va ‘Wa serra 41. ya PKKyî bibo serra azadîya Rayberê Şarê Kurdî Abdullah Ocalanî’ û qiseykerdişan ra dima hunermendî deyîrî vatî û govende ameye girewtene. Montpellîer de zî pîrozkerdiş ame organîzekerdene û şewe de posterê Ocalanî û beyraqê PKKyî abîyî. Siloganî erzîyayî û dima ra qiseykerdişî ameyî kerdene. Şewe de mesajê MLKPyî wanîya û bi girewtena govende qedîya.
Kurdîstanîyê ke Vîyana de cuyenî, rêxistinê çepgirî yê Tirkîya û dostê kurdanê avusturyayî serrgêra 40. ya PKKyî pîroz kerdî.
ANF / BRUKSEL