1ê Gulana 1977î ser o ra 40 serrî derbaz bîyî. Meydanê Taksîmî ke o wext ra nata seba pîrozkerdişî karkeran rê ame padayîş, emserr zî ame qedexekerdiş. Kedkaran qedexe ra dima qerar girewtî ke do Bakirkoy de pîroz bikerî. Kedkarî do bi sloganê “NÊ’ya xo bigîre û bê“ waştişanê xo biqîrî.
1ê Gulane ke zafaneyê dinya de sey Roja Kede û Piştîdayîşêyewbînan yeno pîrozkerdiş, Tirkîya de serra 1977 ra nata bi qetlîam, teda, astengkerdiş û qedexeyan derbaz bîye. 1ê Gulane ke 1977 de Meydanê Taksîmî de ame pîrozkerdiş û sey ‘1ê Gulana gonîyine’ yeno zanayîş de, pêro pîya 34 karkerî ameyî qetilkerdiş û 136 karkerî zî birîndar bibîy. Hedîseyî ra dima 470 kesî ameybî tepiştiş û her çiqas ke 40 serrî derbaz bîy zî, heta nika nêameyo tespîtkerdiş ke kamî gule reşanayo.
Dima ra 470 kesî serbest ameyî veradayîş, labelê kesê ke Komîteya Amadekerdişî de ca girewtî ameyî mehkemekerdiş û doza înan 14 serran dewam kerd. Mehkemekerdişî ra ti kesî ceza nêgirewt û doze kewte. Cok ra doze kirişîya Mehkemeya Heqê Merdiman ya Ewropa (AÎHM).
Bîy sebebê qetlîaman
Qetlîamo ke ame viraştiş ra dima Meydanê Taksîmî hetê karker û kedkaran ra sey ‘Meydanê 1ê Gulane’ ame namekerdiş û her serre pîrozkerdiş tîya de ame kerdiş. Pîrozkerdişê serra 1978 sey yadkerdiş derbaz bî. Her çiqas ke serra 79 de meydan kedkaran rê ame padayîş zî, kedkaran bi qerardarî pîroz kerd. Pîrozkerdişê 89î de polîs Kasimpaşaya Stenbolî de hêrişê karkeran kerd û keso bi nameyê Mehmet Akîf Dalciyo 18 serreyî qetil kerd. Reyna serra 96 de polîsan Kadikoyê Stenbolî de ser 150 hezar kesan de gule reşana û 3 kesî qetil kerd.
Badê 33 serran karker û kedkaran bi têkoşînê xo 1ê Gulane Meydanê Taksîmî de pîroz kerd. Labelê no zaf nê ramit û 2013 de Walîtîya Stenbolî reyna qedexe kerde. Polîsan bi gaz, awa tazyîkin û guleyanê plastîkan hêrişê karkeran kerdbî.
Karkerî Taksîm de israr kenê
Meydanê Taksîmî sey her serran, emser zî karkeran rê ame qedexekerdiş. Her çiqas ke netîceyê pêvînayîşê Wezîrê Karê Zereyî Suleyman Soylu û Serekê Pêroyî yê DÎSKÎ Kanî Bekoyî de ame vatiş ke do Taksîm de pîrozkerdiş nêbo zî, Taksîm teşebusê derbe ra dima bi desan reyan seba çalakîyan ame akerdiş. DÎSK, KESK, TTB, TMMOB û sewbîna sendîkayî do emserr bi siloganê “NÊ’ya xo bigîre û bê“ bêro pîrozkerdiş.
DÎHABER/STENBOL