AZAD ARARAT
3ê Tebaxe 2014 de yew komkişteno bîn tarîxê ma de zêdiya. Bêgûman no çîyêko hol nîyo. Kurdî se (100) rey cihuya re vêşî komkiştenan ra ameyê vîyartene la se ra yew qasî komkiştena cihuyan nêno qal kerdene. Filîm kom kiştenan ser o nêno viraştene, yan zî zaf tay yenê viraştene. Kitabî zaf kemî yenê nûştene. No zî çîyêko hol nîyo. Ganî kurdî bizanê bêwaharî hendayî xedar a. Verê verkan ganî her şar xo bi xo, xo rê wahar bivejîyo. Heke winî bî şaranê bînan zî merdimî pawenê û dej û janan pare kenê.
Her çîyî ra ver îdolojî
Yew şarî rê her çîyî ra ver, yew îdolojî hewce yo. Çi heyf! Tay roşinvîr û sazgehanê ke xebatanê hişî kenê, winî ceht kenê û vanê îdolojî ganî nîyo. Xora bi zanayene yan zî bê zanayene naye zî yew kaya sereyê şaran de yeno kay kerdene. Îdolojî ra pey, ganî yew rayberî estbo ke şar bi rayberê xo ya xo biresno azadiya xo. Seke beden bê sere û mezg nêbeno; yew şar zî bê rayberî nêbeno. Îdolojî û rayberî ra pey, ganî rêxistinê çeşît-çeşît bibê ke şar xo tede rayîr fîno. Çalakîyan virazo û bi çalakîyan xo pratîze bikero.
Xiyanet û xoverdayîş têmîyan o
Serrgêra fermanê (komkiştene/ tertele/ enfal) êzidiyan de nê kemaneyî hemine zî estê. Çi heyf! Ziwanê ma de nameyê komkiştenan zî zaf ê. Hetê komkiştene û nameyê înan ra tarîxê ma zaf zengîn o.
Kurdan sere wedarito. Waharê îdolojî û rayberê xo yê. La fina zî komkiştenan ra nêreynenê. Seba çi? Seba ke kurdan hîna hetê neteweyî ra xo temam nêkerdo. Hetek ra kurd aver şinê la heto bîn ra zî komkiştenan ra rî bi rî manenê. Kurdistan de xiyanet û xoverdayîş têmîyan o. Coka heta xeta welatperwer se ra neway û new serkewte nêbo; peynîya komkiştenan nêyeno.
Zeîftî û atomîzebîyayîş
Rayber Abdullah Ocalanî; komkiştene ra ver, Tevgera Azadî, kadro û şar aya kerd û vat: “Êzidiyan biseveknê”. Seba ke yeno zanayene, hewce nîyo ke ez newe ra qala bîyayîşê hewtay û hîrê fermanan bika. Xayinê kurdan zaf ê. Nêzanîye kurdan de aver o. Kurdî hewna zî dişmenanê xo nêşinasnenê. Coka her çiqas Rayber Abdullah Ocalanî aya zî kerd; komkiştene virazîya. Komkiştene de çi bî çi nêbî? Hewna zî bi temamî nêyeno zanayene. Çend kes ame kiştene, çend kes bî dirbetin, çend kes bazaran de ame rotene, çend se hezaran merdimî cayê xo ra bar kerd şîy, nêyeno zanayene. Komkiştenanê dinya de qet nêbo, peynîye çi bî çi nêbî yeno zanayene, la yê ma kurda o zî nêno zanayene. Naye zeîftî û atomîzebîyayîşê ma hol nîşan dana.
Dejanê êzidiyan ser o kêf kenê
Ez do qala bîyayîşan nêkerî. Çîyê bîyê benê malê tarîxî. Ya girîng ci ra ders vetiş o. La ez vana: “Kurdan hewna zî no komkiştene ra ders nêgirewto”. Coka:
* Komkiştene tayinan rê bî firset û xo pê zengîn kerdêne. Nînan hem kurdê êzidî, hem kurdê misilman, hem zî kesanê bînan yê şaranê bînan ra yê. Dejanê êzidiyan ser o kêf û şahîyan kenê. Naye ra belge mojnayîş qet hewce nîyo. Seba ke êzidiyan mîyan de, pir rehet, nê çîyî yenê dîyene.
* Rêxistinanê qaşo medenî, ceht kenê ke êzidiyan biberê Ewropa. Ez vana nînan û dewletanê Ewropa, êzidiyan sey madeyê xam xo rê bikar anê.
* Heta nika teber ra hetkarîya cidî nêameya kerdene. Hetkarîya ke yena dayene, seba xo êzidiyan mîyan de ca bikerê, yena bikar ardene. La naye zî zaf tay a.
* Heta nika çi kes bi hewayêko cidî dejanê êzidiyan ver nêdejayo. Her kes wazeno dejanê êzidiyan ra feyde bigîro. Çi heyf! Tay giregirê êzidiyan zî wina yê. Ê ke seba êzidiyan dejenê û dejê înan bare kenê; HPG/ YJA Star, YPG/ YPJ, YBŞ/ YJŞ yê ke nînan heta nika zî seba êzidiyan ganê xo kenê feda. Xeylê êzidî destê çeteyan ra raxelisnayê.
Rewşa ewroyên?
Ma bêrê rewşa ewroyên ser o. Ganî heme kurdî û bitaybet kurdanê êzidî, dirbetanê xo bi xo bipîşê. Bitaybetî teber ra hêvîkerdiş do berê komkiştenanê neweyan abikero. Ganî êzidî dewekî, dewî û şarçeyanê xo bi îmkananê xo newe ra awan bikerê. Her parî yo ke hetê hêzên teberî ra bêro dayene mîyan de zehîr esto. Kes bê ke çîyêk biwazo, çîyek nêdano kesî. Merdimî, rêxistinî, dewletî hema zî wina yê. Ganî her keso/a demokrat û xo rê vano ez merdimhes a, ceht bikero û êzidiyan peyser bîyaro ser erdê înan. Êzidî, bi bawerî, urf û edet, kultur û folklorê xo ya dewlemendîya merdimîye yê kehan ê. Qandê cû ganî her merdimhes înan bipawo. Pawitena êzidiyan pawitena yew kulturê kehan yê merdimîye yo.
Ganî hem di hetê bawerî ra hem zî hetê etnîkî ra; sere de êzidî, kakeyî, feylî, zerdûştî, elewî; aşûrî, keldanî, armenî ûêb bêrê pawitene û aver berdene. No yew peymeyê esasî yê şorişgêrî yo. Eke wina bo ma do bieşkê na serrgêra dejnayox biaçarnê weşiya şaran. Ma do bieşkê Rojhilato Mîyanên de baxçeyê şaran awan bikerê.
Şengal de çi qewimya?
3ê Tebaxe de çeteyanê DAIŞî eştî herêmanê Şengal ser. Bi hezaran Êzidîyan qetil kerdî û bi hezaran doman û cinîyan zî hêsîr girotî, bazaranê koleyan de rotî. Hona zî xeylê cinîyê Êzidî destê çeteyanê DAIŞî de yê. Xeylê Êzidîyan zî rîwalo ke xo bixelesnê verê xo day koyanê Şengal û bi no tewr qirkerdişî ra xelesîyay. La bi rojan veyşan û teyşan mendî. Rîwalê teyşanî bi seyan doman û Şengalijan weşîya xo kerdî vinî. Bi des hezaran Êzidîyê ke fermanî ra remay verê xo day Başûr, Rojawa û Vakûrê Kurdistan.
Çi heyf ke peşmergeyanê PDK zî tanq, top û tifinganê xo teslîmê DAIŞ kerdî, Êzidîyan ver hêrîşanê çeteyan de ternay û remay şî. Peşmergeyan o wext ardbî ziwan ke seba nêkerdişê şerî înan corî ra ferman giroto. Verîya fermanî zî PDK tifinganê Êzidîyan kom kerdbi û înan bêpawitiş veradaybi.
Gerîlayî resyay hewara Êzîdxan
12 gerîlayê HPG zey duwanzdekanê (12) Dewrêşê Evdî ke hêrîşî ra dima rayanê nimite ra resyay hewara Êzîdxan, vernîya qirkerdişa hona giran girotî. Wextekê kilm ra dima zî quwetê YPG, YPJ, HPG û YJA Star ke resyay Êzîdxan, sifte pawitişê şarî girotî, ver bi Rojawa korîdorêko weşîye akerdî. Şengalijî 11 rojan de korîdorî ra ravêrîyay hardê Rojawa. Gerîla û şervanan bi xoverdayîşeke tarîxî û destanî Êzîdxan çeteyan rê kerdî mezel.
Fermanî ra dima Şengalijan Yewîye Xoverdayîşê Şengal (YBŞ) û Yewîye Cinîyan yê Şengal (YJŞ) rona û nika pawitişê xo bi xo gênê. Şengal de sîstemêko demokratîk û civakêko polîtîk yeno ronayen.