Qetlîyamê Gurgumî ke mabênê 19 û 26ê kanûna 1978 de qewimîyabî ver bi seyan elewîyê kurdî ameybî qetilkerdiş û bi hezaran kesî zî ameybî koçkerdiş. Emserr serrgêra 37. yê Qetlîyamê Gurgumî ya.
Babete ser o Serekê Komeleya Pîr Sûltan Abdalî yê Şûbeya Gurgumî Salman Akdenîzî qisey kerd.
Şar travma ciwîyeno
Akdenîzî va ‘qetlîyamê Gurgumî, qetlîyamêko hetê kesanê cahilan ameyo viraştiş, çîyêko winasî nîyo’ û qiseykerdişê xo wina domna: “No qetlîyam, netîceyê pêkerdişê hêzê mîyanneteweyî û mîyanê dewlete ra tayê hêzan de virazîyayo. Osmanîyan ra nata elewîyî tim raştê qetlîyaman ameyî û ganî heme komel bi hawayo ortax ser nêyî de bivindero. Çimkî no qetlîyam vera karker, kedkar û bindestan de goreyê menfîetanê hêzanê hegemonan de qewimîyayo. Elewîyî hîna zî tesîrê no travma ra rizgar nêbîyî. Bi nê qetlîyamî de hedef tena kiştişê elewîyan nêbî, eynî wextî de bêmerdimkerdişê herême bî. Yê ke kiştî xora kiştî, yê ke mendî zî bi zorî dayî koçkerdiş. Ganî komel nînan reyde têrî bimano.”
Akdenîzî peynîya qiseykerdişê xo de va ‘Bi nê vîrardişî ma wazenî qatil û kerdoxê qetlîyamî bêrî mehkemekerdiş û zerrîyê ke birîndarî weş bikerî’ û wina qedêna: “Ma do 24ê kanûne de saet 12 de vîrardiş bivirazî û dima ra şêrî Cemxaneyê Terolarî de cem bivirazî.”
Mudaxeleyêk demografîk o
Akdenîzî dewamê qiseykerdişê xo de bale ant kampê bextwaştoxan ke dewlete Terolarê Gurgumî de virazena ser û wina dewam kerd: “Derheqê elewîyan de hîna zî planê lêminî dewre de yî. Qetlîyamê Gurgumî hem can û hem zî malê merdiman rê qest kerdêne. La viraştişê kampê Terolarî mudaxaleyêk demografîk o. Her çiqas ke hîna travmaya Qetlîyamê Gurgumî orte de yo zî, bicakerdişê grûbê selefîyan yê Terolarî de çîyêko masûm nîyo. Hende cayê munasîb yê cîya-cîyayî estbî zî tîya ame tercîhkerdiş û no zî bi zanayîş ame kerdiş. No hetê kulturî, komelkî û sîyasî de mudaxalekerdişê warê şarê herême yo.”
DÎHABER / GURGUM