Emser serrgêra 29. ya Qetlîyamê Helebçe yo. Sedam Huseyînî 16ê Adara 1988 de Helebçe de bi bombeyanê kîmyasalan qetlîyamêk viraşt û netîceyê qetlîyamî de 5 hezar kurdî merdî, yê ke qetlîyamî ra xelisîyayî zî înan de nêweşîya rîşa merdimwere û sewbîna înan de vejîya. Babete ser o Endamê Însîyatîfê Dayîkê Aştîye qisey kerdî.
Dayîkan ra Perîhan Akbulute bale ante qetlîyamê ke Şengal û cayanê bînan de benî ser û wina domnaye: “Heta nika dewletî qetlîyam reyde rî bi rî nêmendî. Yê ke Helebçe dîyî, ewro dişmenanê xo reyde Şengal de hemkarî ronenî û no Helebçe ra hîna dejin o. Ma seba ke yewîya xo awan nêkerdo, ewro Şengal cuyenî. Mamoste Cegerxwînî vato ‘eke şima nêbî yewe, şima do şêrî yew bi yewe’”.
Ewro zî domîyeno
Cemîle Akgune zî wina va: “Roja yewşeme zî serrgêra Qetlîyamê Qamişlo bîye. Ez her di qetlîyaman zî şermizar kena. Ma bi hûmaritiş nêeşkenî qetlîyaman biqedênî û ewro zî qetlîyamî dewam kenî. Ez sey dayîkêk aştî xoverdayîşê şarê êzidî û yê dayîkan silam kena.”Dayîkan ra Guler Bugdaye zî va ‘kayê ke kurdan ser de yenî kaykerdiş, mi zaf dejnenî’ û wina dewam kerde: “Ma do heta peynîya emrê xo Helebçe xo vîra nêkerî. Ez Qetlîyamê Helebçe şermizar û lanet kena.”Tewr peynî zî dayîke Bedîa Gokyuze qisey kerde û wina va: “Heme cayanê Kurdistanî de qetlîyamî hîna zî dewam kenî û her roje dayîkî bermenî. Ma wazenî wa dayîkî nêbermî. Wa Barzanî destê xo rijnayîşê gonîya birayan ra bianco.”
ŞÛJIN/STENBOL