Nûmayişê protestokerdişê qetlîamanê sivî yê dewleta Tirk ramenê. Kurdê ke Almanya de cuwyenê, xo serva protestoyanê Berlîn, Koln, Frankfûrf û Stuttgart kenê hadre. KCD-E, TJKE û NAV-DEM venga tewrbiyayişê nûmayişan kerd.
Kongreyê Civaka Demokratîk yê Awrûpa û Hereketê Ceniyanê Kurd yê Awrûpa, derheqê nûmayişan de damustayin da. KCDE û TJKE Kurdistanijan ra waşt ke, tewrê nûmayişanê ke bi slogana ‘Her ca Sûr, her ca Cizîr, her ca xoverdayiş’ viraziyenê bibê.
Damûstayin de hayr anciya terora dewleta Tirk ya dûstê Vakûrê Kurdistan ser û wina vajiya: “AKP vera Kurdan herbê do bê qaîde ramnena. Bi konseptê herb şarê ma qirkerdinê fizikî ra ravêrnenê. Dîktatoriya AKP û Erdogan’î, ke faşîzmê Hîtler û Mûssolînî ra îlham gêna hedef kena ke bi qirkerdiş netîce bigîro.
Awrûpa Kurdan kena qûrban
TJKE û KCD-E vist vîrî ke, vera nê plananê qirkerdin, tenya jû ray esta, a zî xoverdayişê topyekûn û vajiya ke, vera faşîzm û dîktatorî, gune her ca açarniyo cayê tekoşîn û xoverdayişî.
Aşkerekerdiş de vera bêvengiya sazgehanê Awrûpa yê zey, KA, PA, NJ, MHMA nêrazîbiyen damûsniya û wina vajiya, ‘xoverdayişê xorayverîn ê şarê Kurd, kenê qurbanê menfaatanê ekonomîk û siyasî yê dewlet û hikûmetanê Awrûpa. Cok ra dûstê qirkerdişê Kurdan bêveng manenê.’
Meşt beno berey
TJKE û KCD-E ard ziwan ke, gune Kurdê ke teberê welatî de cuwyenê, nûmayişanê xo gird û jêde bikerê û wina vajiya: “Encex bi xeta nûmayiş ma êşkenê verniya dîktatoriya faşîst vinderê, planê ci bixerpnê. Nayî ra, gune şarê ma sînoranê xo ravêrno, îmkananê xo seferber bikero. Rol kewno her welatijî ser. Gune herkes çormeyê xo sewqê xoverdayişê xorayverînan bikero.
Gune cenî û gencî rayverîn bikerê
Aşkerekerdiş de vajiya ke, ma se bikerê, gune nika bikerê, meşt beno ke bibo berey û hayr anciya hêrişanê dewlet ser: “AKP û faşîzmê Erdogan’î wazenê xoverdayiş bişikînê. Vera nay gune ma zî lez bikerê. Raya welatperwerî û demokratbiyîn, tewrbiyayişê xoverdayişê vera dîktatoriya faşîzmî ya. Gune herkes şew û roj nûmayiş de bo. Her sempatîzan gerek goreyê nûmayişan xo plan bikero. Navendê Civakî, meclîsî, cenî, gencî gune pêrokîn plansazeyê rêxistinanê ma taqîp bikerê û bi pêrokîn qûwetê xo tewrê nûmayişan bibê.
30ê Çile de nûmayişî
Goreyê plansazeyê TJKE û KCD-E, 30ê Çile de, Koln, Stûttgart, Frankfûrt û Berlîn de û welatanê bînî de nûmayişî ciya viraziyenê. Aşkerekerdiş de serva tewrbiyenê nê nûmayişan niya veng ame dayen: “Vakûrê Kurdistan de, cenî û gencî rayverînê xorayverînan kenê. Awrûpa de zî gune cenî û gencî nûmayiş û tekoşîn rê rayverîn bikerê. Veng danime welatperwer, demokrat, cenî û gencan ke, bi qerardarî û radîkal wayrê xoverdayişê xorayverînan bivejyê û her ca açarnê Sûr, Cizîr û xoverdayiş.
ANF/NAVENDÊ XEBERAN
Detayê nûmayişan
Berlîn: Nûmayişa ke Berlîn de viraziyena, sûkanê Dresden, Halle, Magdebûrg, Hannover, Oldenbûrg, Lohne, Kassel, Kîel, Hambûrg, Aûrîck, Bremenhafen, Erfûurt, Celle ra zî Kurdistanijî û dostê ci tewr benê. Nûmayiş seat 15.00’î de Potsdamer Platz de destpa keno.
Koln: Nûmayişa ke hetê YJK-E yena organîzekerdin, sûkanê zey Osnabruck, Nunster, Bîelefeld, Hagen, Dortmûnd, Essen, Dûîsbûrg, Dusseldorf, Wûppertal, Leverkûsen, Duren, Aachen, Bonn, Troîsdorf zî tewr beno. Nûmayiş seat 10.00î de Roncallîplatz de destpa keno.
Frankfûrt: Nûmayişo ke seat 14.00î de Kaîserstrasse de viraziyeno, sûkanê zey Gîessen, Hanaû, Maînz, Offenbûrg, Nurnberg, Saarbrucken ra zî Kurdî û dostê ci tewr benê.
Stûttgart: Sûkanê Munchen, Bodensee, Freîbûrg, Pforzheîm, Heîlbron ra zî Kurdî û çormeyê demokratîk tewr benê.