Çendêk verê Dêrsim de bi desan cayan de netîceyê bombevarnayîşê helîkopteran û veşnayîşê leşkeran de daristanan de şewat vejîybî û no şewat nizdîyê 2 hewte dewam kerdbî. Şewatî ver xeylê cayan de daristanî veşaybî û hêzê dewlete mudaxaleyê şewatî nêkerdbî û destûr nêdaybî ke şar zî mudaxale bikero.
Kesê ke problemanê komelî ver hesas î, hewl daybî ke şewat bimirênî, labelê hetê leşkeran ra bi mehneya ‘mayînî estî’ ameybî astengkerdiş. Herçiqas ke ameybî astengkerdiş zî bi ruhêko seferberî mudaxaleyê şewatî kerdbîy û tewr peynî bi varayîşê varanî zî şewat bi temamî mirîyabî.
Babete ser o Endama Heyetê Caardişî yê Merkezê HDPyî Çîlem Kuçukkeleşa ke seba cigêrayîşê ziraro ke netîceyê şewatê Dêrsimî de vejîya bikero, ameye Dêrsim, derheqê mirênayîşê şewatî de qisey kerde.
Kuçukkeleşe va ‘nika zaf cayanê Kurdistanî de zirar dîyeno tebîet û qetlîyamê tebîetî yeno kerdiş’ û wina dewam kerde: “Sey nimûne dewijê ke dewa Halvorî de hewl dayî mudaxaleyê şewatî bikerî, raştê gulevarnayîşê leşkeran ameyî. Cinîyan bi ruhê xoverdayîşê 1938î mudaxaleyê şewatî kerdî û no mîraxê xoverdayîşî sey kulturî do neslanê ameyoxan rê zî bêro verdayîş.”
Her dare sey merdimî ya
Kuçukkeleşe dewamê qiseykerdişê xo de va ‘veşayîşê daristanan, dewamê polîtîkayê ke 2 serranê peyênan de yenî meşnayîş o’ û wina domnaye: “Dêrsim hetanê tewr cîddî yê şerî reyde têrî mendo û nê şewatî zî dewamê nînan o. Dêrsim bi tebîetê xo çimê dinya ver de yo. Her dara ke Dêrsim de veşena, sey veşayîşê merdimêkî yo. Beno ke tayê veşayîşê daran sey ke êzingêko wişk bişewito, labelê seba ma wina nîyo; ma sey veşayîşê merdimî vînenî. Yê ke sey ma kulturê elewîtî ra ameyî, qîmîşîya tirakerdişê meyweyêka resaye daxî nêkenî. Çimkî ma resayîşê aye meywe rê rêze gênî. Her dare û her morcelaya tebîetî seba ma pîroz î.”
Çinîkerişê merdîmîyê yo
Kuçukkeleşe qiseykerdişê xo de vatişê Seyyîd Rizayî yê ‘ez vaşo ke binê kerrayan ra vejîyeno de ya’ arde vîr û wina va: “Neslê ma seba na cografya bedel da û her kerraya ke gonîya înan ginaya seba ma pîroz a. Ma heme çîyê ke veşayî sey ke Seyyîd Riza veşayo, dejê ci hîs kerd. Merdimî çiqas nizdîyê cografyaya xo bo, neslê ci hende dewam keno. Labelê bi veşayîş çinîkerdişê na cografya, raştîya xo de çinîkerdişê merdimîye reyde eynî yo.”
MELÎKE AYDIN/ŞÛJIN/DÊRSIM