Sêwaz

Serre 1993, 2ê asma temuze. Ca Sêwaz, Otelê Madimak.
Tarîxê Tirkiye de onca ferman ame bî dayene.
Ferman, seweta qetilkerdena aleviyan.
Dewleta tirkî onca qetilkaranê xo verdana ra aleviyan ser. Na dem, ne Alî yeno hewarê aleviyan ne zî Haci Bektaşî Welî.
Partiya sosyal demokratan Tirkiye de zerrê koalîsyon de ca cena, o waxt. Tirkiye de aleviyan her tim leto jede reyê xo dê sosyal demokratan, yanê CHP, yanê partiya Ataturk.
Lazê qetilkarê Dersîm Îsmet Înonu, Erdal Înonu hukumat de bî. Aleviyan, o zî çînît bî we, reyê xo day bî ey.
Hama zirçayîs û nalenya aleviyan ‘nêrestî’ gosê hukumatî, nêrestî gosê  Erdal Înonu.
Alevî vêsayî, kile reste asmên, Anqara de hukumatî na roştî nêdiye.
Însanan, însanê alevî vêsnenê, dewleta faşîste û hemkarê aye sosyal demokratan ra yardim nêamenê.
Çi xerîb!
Pêro qetlîamanê aleviyan de sosyal demokratî serdest bî. Dewlete sero bî. Hama verva kistena aleviyan vengê xo nêvetenê.
Ha CHP, ha SHP, ha SODEP, pêro jû yê. Çike waxtê hukumdariya înan de aleviyan rê zulm biyo, amê kistene, aleviyan qetlîamî diyê.
Peyniye de nî partî pêro odetê Ataturk ra amenê, rayverê xo Ataturk bî.
Ez nêwazen na derheq de kerdena faşîstan û îslamî faşîstan sero vinderî. Înan xorê dewlet û dînê xo ‘seveknenê’. Î faşîst bî.
Î rozan de Kurdistan zî vêsenê. Dewleta ke alevî vêsnenê, î rozan de dewê Kurdan vêsnenê, kerdenê tol.
Çi xerîb!
Alevî naye rê bêveng mendenê, komelanê xo de resmê Ataturk darde kerdenê, sosyal demokratan dima şiyenê.
Qetlîamê aleviyan yê Sêwaz ser ra 9 serrî vêrdî ra, AKP biye serdest. AKP vat ‘Cem evî cumbuş evî’ hama taye aleviyan onca zî zerrê na partiye de ca guret.
Serdest biyayena AKP ser ra onca 9 serrî vêrdî ra, dawa Sêwazî rîwalê raverayena waxtî ra amê warodayene.
RTE na qerar qomê xore kerd bimbarek, leto jede alevî hona zî dewleta xora haskenê.
Na mavênde waxtê weçînîtîsan de aleviyan seweta mebusenî CHP de vaye kerdenê, poşt dênê CHP û danê ci.
Çi xerîb!