Bi nezdîbîyayîşê referandûmî ra pîya, HDP zî lezîn da gureyanê xo. Peynîya hefte zî HDP xêlê cayan de bi şarî ra ame pêhet û vengê ’Nê’ kerd berz. Roja Şeme jew heyetê HDP Sêwereg û Hêlwan de zî bi şarî ra ame pêhet û raştê eleqeyê gird ame.
Verfekê HDP Osman Baydemîr, Parlementer Mîthat Sancar, Saadet Becerîklî û îdarekarê DBP bi yew heyetî şî qezayanê Riha Wêranşar, Sêwereg û Hêlwan. Heyeto ke nê qezayan de esnafan zîyaret kerd, dima ra xîtabê şarî kerd û seba ‘Nê’ desteg waşt.
Heyetê HDP ke Wêranşar ra dima ravêrd Sêwereg, bi konvoy şarî û esnafê sûk zîyaret kerd. Peycoy heyet ravêrd Parka Kinali û xîtabê bi seyan kesê ke paweyê ci bî kerd.
Vatişê ’Nê’ waştişê haştî yo
Parlementer Osman Baydemîr ke qisey kerd vist vîrî ke, meseleya Kurd encex şikîyena netîceyê muzakere de bîro çarekerdiş. Baydemîr’î da zonayen ke, vejyayîşê ’Nê’ yeno maneya newe ra ronayîşê maseyê muzakere yo.
Parlamenter Mîthat Sancar’î zî vist vîrî ke ’Nê’ de xeyir esto û wina va: “Îxtîdar û Erdogan seba şarî nê, seba menfietanê xo vengê ‘Ya’ wazenê. Welatî rijnay, veşnay, ma seba nayî vanê ‘Nê’. Ma zûrkerî rê, def û dolaban rê, tiritişî rê, bêkarîye rê vanê ’Nê’.”
Îxtîdar ê şaran o
Sêwereg ra dima heyet ravêrd Hêlwan û raştê eleqeya gird yê welatijan ame. Tîya de zî HDP’yijan esnaf û şarî selamî kerd û seba vindernayîşê rijnayîşê gonî waştişê ’Nê’ kerdî.
Sancar ke tîya de qisey kerd vist vîrî ke îxtîdar çarçoveyê vûrnayîşê Makeqanûna Bingeyî de wazena vûrnayîşê rejîmî virazo û wina va: “Îxtîdar nêbena mird, ‘tim mi rê’ vana. Seba şarî teba nêwazenê. Îxtîdar yê şaran o. Ma seba vindernayîşê gonî, seba haştî û waûbirayîye vanê ‘Nê’.
Seba Nisêbîn, Cizîr, Şirnex vajê ’Nê’
Baydemîr’î zî da zonayen ke Hêlwan do 16ê Nîsane de zihnîyeta faşîstîn rê cewabêko rind bido û vajo ‘Nê’. Verfekê HDP Osman Baydemîr’î vist vîrî ke 15 serrî yo ke bi xapînayîşê şarî îxtîdarê xo day ramitiş û va, ‘La na qorî bi reyanê ‘Nê’ dewrê îxtîdara înan do biqedîyo. Ma dê seba Nisêbîn, Cizîr, Şirnex vajê ’Nê’. ’Nê’ yê ke ma bidê dê seba Şirnex, Cizîr û Nisêbîn bibo derman.