Azayê KESK yê ke parqa Lezgo de are bî, ‘qedexe’ yê vetişê dewlet û terora ci, bi damûstayinê çapemenî protesto kerdî. Azayê Egitim-Sen Necatî Soluk damûstayîn wend û hayr ant sewqiyatê eskerî, açarnayişê mekteb, nêweşxane û sazgehan zey qerargeh ser. Solûk’î aşkere kerd ke, herb vilayê pêrokîn qeza û sûkan kerdî û wina va: “Bi ablûqe wazenê qeza û sûkan veng-tol bikerê. Qeçek-doman û ceniyan, bi seyan kesan benê salonanê spor, kenê hepis. Qeçek û ceniyan hedef gênê. Meyitê însanan bi rojan kuçeyan de manenê.
Solûk’î vist vîrî ke, dewlet nezdiyê 3 hezar û 800 mualim-mamosteyan verniya operasyonî de, kurdistan ra ant. Perwerde, weşî û pêrokîn xîzmetê goreyê herb amey dîzayn kerdin. Damûstayin de vajiya ke, hurendiya ‘Toros’anê Spî’ yê vizêr, ewro ‘Ranger’ê Siya-Spî’ giroto û hayr anciya bombekerdişê keyeyan, birnayişê aw û ceyranî ser. Solûk’î aşkere kerd ke, wazenê pêrokîn çormeyê emeg û demokrasî biqûtifînê.
Roj roja vindernayişê lejî ya
Azayê Egitim-Sen Necatî Solûk’î wina venga dekewtişê hereket da: “Ma nêwazenê, ser no hardî hinî kes bimiro! Wezîfeyê ma temaşekerdişê merdişê însanan niyo, weşîkerdişê merdiman o. Damûstayin de vajiya ke, ‘Roj roja vindernayişê herb-lejî ya, roja înşakerdinê haşitî ya. Qandê-serva weşîkerdiş veng bide haşitî.
NAVENDÊ XEBERAN