Merdişê însanan nîwazena
Denîz Nakî rîwalê qiseyanê xo yê “Nîwazena mordemî bimirê. Haştî wazena. Nayî ra waştişê haştî ra zewbîn çare çinyo” hetê Lîjneya Dîsîplînê Fûtbola Profesyonel (PFDK) raştê cezayê nêvejyayişê 12 maçî û 19 hezar û 500 TL ame. Nakî da zonayen ke o pey qise û vatişanê xo yo û aşkere kerd ke, pêrokîn cezayî siyasî yê.
Wezîfeyê însanî
Nakî vist vîrî ke futbol birabiyen, jûbiyen û jûbînî ra hurmet damusnayiş o. Kaykerdoxê Amedsporî aşkere kerd ke bi waştena haştî wezîfeyê siyasî nê, wezîfeyê însanî ardê ca. Nakî va ma hona kî fam nîkerd çima kaya bi Fenerbahçe de akerdişê pankarta “wa domanî nîmire, bîrê maç” rê ceza ame birnayen.
Îşaretê Rabîa kenê, selama eskerî danê
Nakî aşkere kerd ke panqarta haştî rê kî ceza birnenê û vist vîrî ke Dersimspor rê kî rîwalê posterê Berkîn Elvan’î rakerdî ceza ame dayen û niya va: “Taynî kaykerdoxî îşaretê Rabîa kenê, selama eskerî danê, la rîwalê nay nînê cezakerdiş. La wexto ke ma vanime ‘domanî nîmire, bîrê maç’ siyaset kenime û raştê cezayan yenime. Ez nayî rê mane nîdana.
Raya raşt de dewam
Nakî vist vîrî ke 3ê Adar de maça fînalê çayrek ya bi Fenerbahçe çetin a û va, zey ke Bûrsa de ma serkewtî, ma îşkenê Kadikoy de kî serkewê. Alwozî na maç bi çar çiman pîtenê. Dûstê camîa û taximeke gird kaykenime.
Denîz Nakî serva poştdayenan herkesî rê berxodariya xo vat û niya va: “Wijdanê mi rehet o. Ez do raya ke raşt vînena de dewam bikera. Wa herkes bizano ke ez do raya xo ra xo şaş nîkera. Na raya haştî ya. Serva cuwyana azad ca verdayiş çinyo.
DÎHA/DERSIM